काठमाण्डौ ।अमेरिकामा गैरकानुनी रूपमा बस्दै आएका नेपालीहरूलाई सरकारले लगातार देश निकाला गर्न थालेको छ। पछिल्लो पटक, अध्यागमन कानुन उल्लंघन गरेको आरोपमा थप चार नेपालीलाई निष्कासन गरिएको छ।

अवैध आप्रवासीहरूको बढ्दो समस्या

विगत केही महिनायता, अवैध रूपमा अमेरिका प्रवेश गरेका नेपालीहरू सुरक्षाकर्मीको निगरानीमा पर्न थालेका छन्। अमेरिकी सरकारको कडाइका कारण रोजगारदाताहरूले समेत उनीहरूलाई काम दिन अस्वीकार गर्न थालेका छन्। जसका कारण अवैध रूपमा बस्दै आएका नेपालीहरूको दैनिक जीवन झनै कठिन बन्दै गएको छ।

कागजपत्र नभएका नेपालीहरू बीच असुरक्षा र मानसिक तनाव बढ्दो छ। कतिपय लुकीछिपी काम गरिरहेका छन् भने केहीले पक्राउ पर्ने डरले घरमै सीमित हुनुपरेको छ।

सहयोगको साटो शोषण

कानुनी रूपमा अमेरिका बसोबास गरिरहेका केही नेपालीहरूले कागजपत्र नभएका नेपालीहरूमाथि शोषण गरिरहेका गुनासोहरू बढिरहेका छन्। कतिपयले पक्राउ पर्नबाट जोगाइदिने भन्दै रकम असुल्ने गरेका छन्। समस्या परेका नेपालीलाई सघाउनु पर्ने ठाउँमा, केहीले उल्टै धम्की दिने, सूचना चुहाउने र आर्थिक रूपमा फाइदा उठाउने गरेको स्थानीय नेपालीहरूले बताएका छन्।

निष्कासन गरिएका नेपालीहरू

गत सातामात्रै चार जना नेपालीलाई अमेरिका सरकारले निष्कासन गरेको छ। उनीहरूमध्ये दुई जनासँग राहदानी थिएन, जसका लागि अमेरिकी सरकारले ट्राभल डकुमेन्ट उपलब्ध गराएर नेपाल फर्काएको हो। बाँकी दुई जना भने आफ्नै राहदानी प्रयोग गरी नेपाल आएका छन्।

अहिले पक्राउ परेकाहरूलाई नियमित उडानमार्फत नेपाल पठाइँदैछ भने अन्य केहीलाई चार्टर फ्लाइटबाट पठाउने तयारी भइरहेको छ। हालै सार्वजनिक तथ्यांक अनुसार, अमेरिकाले एक हजारभन्दा बढी गैरकानुनी रूपमा बसिरहेका नेपालीहरूलाई निष्कासन गर्ने तयारी गरिरहेको छ।

अमेरिकी सरकारको कडा निगरानी

गैरकानुनी आप्रवासीहरूमाथि कडाइ गर्दै अमेरिकी सुरक्षाकर्मीहरूले नियमित जाँच बढाएका छन्। अवैध रूपमा बसिरहेका आप्रवासीहरू मात्रै होइन, उनीहरूलाई रोजगार दिने कम्पनीहरू पनि निगरानीमा परेका छन्। कतिपय कम्पनीहरूले मानवीय कारण देखाउँदै काम दिन खोजे पनि सरकारी निगरानीका कारण डर मान्न थालेका छन्।

अमेरिकामा गैरकानुनी रूपमा बसिरहेका नेपालीहरूको अवस्थालाई सरकारले कडाइ गरेसँगै उनीहरूको भविष्य अन्योलपूर्ण देखिएको छ। पक्राउ पर्ने डर, रोजगारी गुम्ने चिन्ता, र स्वदेश फर्कनु पर्ने बाध्यता नेपाली आप्रवासीहरूका लागि ठूलो चुनौती बनेको छ। यस परिस्थितिमा, नेपाली समुदायबीच आपसी सहयोग र एकता आवश्यक देखिन्छ, ताकि आपतकालीन अवस्थामा कोही पनि थप शोषणमा नपरोस्।

• Jigyasa media