वासिङ्टन डिसी नजिकै एक यात्रु विमान र अमेरिकी सैन्य हेलिकप्टर ठोक्किँदा पोटोम्याक नदीमा खस्ने भयावह दुर्घटना भएको छ। उद्धारकर्मीहरूले अहिलेसम्म ४० जनाको शव नदीबाट निकालिसकेका छन्, भने विमानमा सवार ६४ यात्रु र हेलिकप्टरका ३ जना चालक दलका सदस्यको ज्यान गएको आशंका गरिएको छ।

भयंकर टक्करपछि विमान नदीमा खस्यो

बुधबार राति क्यान्ससबाट वासिङ्टन आउँदै गरेको अमेरिकन एयरलाइन्सको सीआरजे ७००० बम्बार्डियर जेट र अमेरिकी सेनाको ब्ल्याकहक (एच–६०) हेलिकप्टर आकाशमै ठोक्किएर नदीमा खसेका थिए। हेलिकप्टर सैन्य प्रशिक्षण उडानमा रहेको बताइएको छ।

विमानमा ६० यात्रु र ४ जना चालक दलका सदस्य थिए। दुर्घटनामा नामी फिगर स्केटरहरू पनि परेका थिए, भने रसियाले पनि आफ्ना नागरिक सवार रहेको पुष्टि गरिसकेको छ।

अमेरिकी राष्ट्रपति ट्रम्पको प्रतिक्रिया

पूर्व राष्ट्रपति डोनाल्ड ट्रम्पले दुर्घटनाप्रति दुःख व्यक्त गर्दै सामाजिक सञ्जाल 'एक्स' मार्फत लेखेका छन्,

"रेगन नेसनल एयरपोर्ट नजिक भएको हृदयविदारक दुर्घटनाबारे जानकारी प्राप्त गरिसकेको छु। मृतकका परिवारहरूप्रति समवेदना व्यक्त गर्दछु।"

वायुसेनाको हेलिकप्टर किन यात्रु विमानको मार्गमा आयो? अनुसन्धान जारी

दुर्घटनाअघि एयर ट्राफिक कन्ट्रोलरहरूले सेनाको हेलिकप्टरलाई यात्रु विमानको उडानमार्गमा प्रवेश नगर्न चेतावनी दिएको पाइएको छ। नियन्त्रण कक्षको अडियोमा कर्मचारीहरू तनावमा परेको आवाज सुनिन्छ।

यस घटनाले अमेरिकाको हवाई सुरक्षामा गम्भीर प्रश्न खडा गरेको छ। हेलिकप्टर दुर्घटना हुनुको कारण पत्ता लगाउन विस्तृत अनुसन्धान थालिएको अधिकारीहरूले बताएका छन्।

• Jigyasa media