काठमाडौं । देशभर मौसम पुनः अस्थिर बन्दै गएको छ। जल तथा मौसम विज्ञान विभागका अनुसार आज सोमबार देशका विभिन्न भागमा मेघगर्जन, चट्याङसहित वर्षा र उच्च भूभागमा हिमपातको सम्भावना रहेको छ।

विशेषगरी कोसी, वाग्मती, गण्डकी, लुम्बिनी र कर्णाली प्रदेशका पहाडी तथा हिमाली भूभागहरूमा हल्कादेखि मध्यम वर्षा र हिमपातको सम्भावना छ भने बाँकी भूभागका थोरै स्थानहरूमा समेत मेघगर्जनसहित वर्षा हुनसक्ने विभागले जनाएको छ।

काठमाडौं उपत्यका पनि चट्याङ र मेघगर्जनसहितको हल्का वर्षाको चपेटामा पर्नसक्ने मौसमविद् रोजन लामिछाने ले जनाएका छन्। “बिहान आंशिक बदली रहेको उपत्यकामा दिउँसो वर्षाको सम्भावना देखिएको छ,” उनले बताए।

रातिको मौसम पनि स्थिर रहने देखिँदैन। पहाडी क्षेत्रहरूमा आंशिकदेखि सामान्य बदली रहनेछ भने अन्य भूभागमा मुख्यतया सफा देखिए तापनि हल्का बदली रहने विभागको अनुमान छ। देशभर पश्चिमी वायु र बंगालको खाडीबाट आएको जलवाष्पयुक्त हावाको प्रभाव कायम रहेको बताइएको छ।

यात्रु, कृषक तथा आकाशे बिजुलीप्रति संवेदनशील क्षेत्रहरूमा सतर्कता अपनाउन मौसम विभागले सबैमा अनुरोध गरेको छ।

• Jigyasanepal