काठमाडौं – भक्तपुरको नरेफाटमा १६ वर्षअघि ट्याक्सी चालकको हत्या प्रकरणमा संलग्न मुख्य आरोपी पक्राउ परेका छन्। पक्राउ पर्नेमा काभ्रेको फोक्सिङटार निवासी ३७ वर्षीय विरमान सिंह भुलन तामाङ रहेका छन्।

२०६६ माघ २६ गते ट्याक्सी चालक मेघ बहादुर तामाङको शव रोकिराखेको ट्याक्सीभित्र गलबन्दीले बाँधिएको अवस्थामा फेला परेको थियो। घटनापछि उपत्यकाको सुरक्षा संवेदनशीलता बारे चर्को बहस भएको थियो।

उपत्यका अपराध अनुसन्धान कार्यालयका प्रवक्ता काजी कुमार आचार्यका अनुसार २०६६ मंसिर २६ गते राति साढे १२ बजे ट्याक्सी रिजर्भ गरेका चारजनाले मदिरा सेवन गरेपछि चालकलाई नियन्त्रणमा लिएर नरेफाटमा हत्या गरेका थिए। गलबन्दीले घाँटी कसेर हत्या गरेपछि खुट्टा बाँधेर उनको शव फालिएको थियो।

घटनाको अनुसन्धान अनुसार, हत्या लुटपाटका लागि गरिएको थियो। अपराधीहरूले चालकको मोबाइल र २० हजार रुपैयाँ लिएर फरार भएका थिए। घटनापछि दुई जना पक्राउ परे पनि विरमानसहित दुई जना फरार थिए।

१५ वर्षसम्म लुकेर बसेका विरमान तामाङ मलेसियामा पाँच वर्ष वैदेशिक रोजगारी गरेर फर्किएपछि काठमाडौंको सुनाकोठीमा मजदुरी गर्दै आएका थिए। प्रहरीले उनलाई ललितपुरबाट पक्राउ गरेको हो। भक्तपुर जिल्ला अदालतले २०७८ भदौ ३ गते कर्तव्य ज्यान मुद्दामा उनलाई २० वर्ष कैद सजाय तोकेको थियो।

• Jigyasa media