काभ्रेपलाञ्चोक खानीखोला । खानीखोला गाउँपालिकाको सत्रौं गाउँ अधिवेशन भव्य रूपमा सम्पन्न भएको छ। अधिवेशनले आर्थिक वर्ष २०८२/०८३ का लागि रु ५२ करोड २३ लाख ३२ हजार ३५३ को बजेट सर्वसम्मतरूपमा पारित गरेको हो। गाउँपालिका अध्यक्ष **इन्द्रबहादुर थिङ ‘छिन्ताङ’**को अध्यक्षतामा सम्पन्न अधिवेशनले नीति तथा कार्यक्रम पनि पारित गरेको छ।

स्वास्थ्यमै प्राथमिकता — ‘झण्डा र अण्डा’ कार्यक्रम लागू

गाउँपालिकाले गर्भवती महिलाको स्वास्थ्य सुधारलाई मुख्य प्राथमिकता बनाउँदै ‘झण्डा र अण्डा कार्यक्रम’ ल्याउने घोषणा गरेको छ। यस कार्यक्रमअन्तर्गत गर्भवती महिलालाई निःशुल्क १० क्रेड अण्डा प्रदान गरिनेछ।

त्यस्तै, आङ खसेका महिलाको शल्यक्रिया गर्नुपरेमा गाउँपालिकाले रु ५,००० बराबरको राहत सहायता उपलब्ध गराउने निर्णय पनि अधिवेशनबाट पारित गरिएको छ।

 बजेटका प्राथमिकता : पूर्वाधारदेखि रोजगारीसम्म

गाउँपालिकाका उपाध्यक्ष दोर्जेमान जिम्बाले बजेट प्रस्तुत गर्दै पूर्वाधार, कृषि, शिक्षा, स्वास्थ्य, रोजगारी, औद्योगिकरण लगायतका क्षेत्रलाई बजेटमा प्राथमिकता दिइएको जानकारी दिनुभयो।

उहाँले स्थानीय उत्पादनमाथि आधारित उद्योग प्रवर्द्धन, कृषिमा आत्मनिर्भरता, शिक्षाको पहुँच विस्तार, सूचना प्रवाह, सामाजिक न्याय, र सुशासनलाई आगामी वर्षको मुख्य आधार बनाइने प्रतिबद्धता जनाउनुभयो।

“जसको उत्पादन, उसैलाई अनुदान” — कफीमा ३५ रुपैयाँ प्रतिकिलो अनुदान

गाउँपालिकाले कफी, खुवा, तोरी, कोदोको रक्सी, बेलको जुस लगायतका स्थानीय उत्पादनलाई गाउँमै प्रशोधन गर्ने नीति लिएको छ।

कफी उत्पादनमा प्रतिकिलो ३५ रुपैयाँ अनुदान दिइने र स्थानीय ब्रान्ड निर्माण गर्दै बजार विस्तार गरिने लक्ष्य तय गरिएको छ।

 शिक्षा र उद्यमशीलता जोड्ने सामुदायिक अध्ययन केन्द्र

गाउँपालिकाले सबै सातै वडामा सामुदायिक अध्ययन केन्द्र स्थापना गर्ने निर्णय गरेको छ। यी केन्द्रहरूले शिक्षा, सीप विकास, उद्यमशीलता प्रवर्द्धनमा योगदान पुर्‍याउने विश्वास लिइएको छ।

 उत्कृष्ट सेवा पुर्‍याउने कर्मचारीलाई सम्मान

यस अधिवेशनमा उत्कृष्ट सेवा पुर्‍याउने विभिन्न कर्मचारीलाई सम्मानपत्र, दोसल्ला र नगदसहित सम्मान गरिएको छ। सम्मानित हुनेमा:

सन्तमान थिङ – वडा नं. १ अध्यक्ष (उत्कृष्ट वडा)

अर्जुन भुजेल – सूचना अधिकारी

चक्रबहादुर थापा – शिक्षा शाखा प्राविधिक सहायक

खगेन्द्र थापा – आन्तरिक लेखा परीक्षण

सिजन थिङ – कार्यालय सहयोगी

अस्वीर बल – हल्का सवारी चालक

राममाया मुक्तान – राष्ट्रिय महिला स्वयंसेविका

गाउँपालिकाका अध्यक्ष इन्द्रबहादुर थिङ, उपाध्यक्ष दोर्जेमान जिम्बा र प्रमुख प्रशासकीय अधिकृत जीवनराज अर्यालले सम्मान प्रदान गर्नुभएको थियो।

अन्तिम प्रतिबद्धता: सुशासन, समृद्धि र समावेशी विकास

गाउँपालिकाले आगामी दिनमा सामाजिक न्याय, स्वास्थ्य सुधार, कृषि आधुनिकीकरण, स्थानीय उत्पादनको प्रवर्द्धन र सुशासनको सुनिश्चितता गर्दै समावेशी विकासको अभियान अघि बढाउने अठोट व्यक्त गरेको छ।

• Jigyasanepal