काठमाडौं, माघ २५ – खोटाङका मदन राईलाई बाल यौन दुर्व्यवहारको आरोपमा दोषी ठहर गर्दै अदालतले साढे दुई वर्ष कैद सजाय सुनाएको छ।

जिल्ला अदालत खोटाङका न्यायाधीश नारायणप्रसाद दाहालको इजलासले उनलाई दोषी ठहर गर्दै शुक्रबार उक्त फैसला सुनाएको हो। साथै, राईलाई एक लाख रुपैयाँ जरिवाना र पीडितलाई डेढ लाख रुपैयाँ क्षतिपूर्ति भराउन पनि आदेश दिइएको छ।

राईविरुद्ध २०८० जेठ २१ गते बाल यौन दुर्व्यवहारको अभियोगमा मुद्दा दर्ता भएको थियो। प्रारम्भिक अनुसन्धानपछि उनी चार लाख रुपैयाँ धरौटीमा रिहा भएका थिए।

७५ वर्षीय राईले सञ्चालन गरेको सुभद्रा मदन फाउन्डेसनमै अध्ययनरत एक बालिकाले उनीविरुद्ध उजुरी दिएकी थिइन्। उजुरीमा उनले अश्लील हर्कत गरेको, संवेदनशील अंगमा हात हालेको, शारीरिक सम्पर्कका लागि आग्रह गरेको तथा नग्न शरीर देखाएर अनैतिक क्रियाकलापमा उक्साएको आरोप लगाइएको थियो।

प्रहरीले वैशाख २९ गते उनलाई पक्राउ गरी अनुसन्धान गरेको थियो। बालबालिका सम्बन्धी ऐन २०७५ को दफा ६६ को उपदफा ३ (क), (ग), (ङ) अन्तर्गतको कसुरमा दोषी ठहर भएसँगै अदालतले कठोर सजाय तोकेको हो।

यो निर्णयले बाल अधिकार संरक्षणमा थप जागरूकता ल्याउने विश्वास गरिएको छ।

• Jigyasa media