काठमाडौं, भदौ २७ - पाँचथरको फालेजुङ गाउँपालिका–५ डाँडागाउँमा भएको ग्रिनेड विष्फोटमा ज्यान गुमाएका परिवारलाई सरकारले ५ लाख रुपैयाँ राहत उपलब्ध गराउने निर्णय गरेको छ। स्वास्थ्य तथा जनसंख्या मन्त्री प्रदीप पौडेलले सोमबारको मन्त्रिपरिषद् बैठकले यस्तो निर्णय गरेको जानकारी दिए।

यस घटनामा साढे २ वर्षीया प्रिन्सा सावाँ र ११ वर्षीय दिप्सन सावाँको ज्यान गएको थियो। मन्त्री पौडेलका अनुसार, घाइते भएका १० वर्षीय पवन राई र ७ वर्षीय दिप्सन राईको उपचारका लागि लाग्ने सम्पूर्ण खर्च सरकारले व्यहोर्ने निर्णय पनि भएको छ। हाल उनीहरूको उपचार कीर्तिपुरस्थित बर्न अस्पतालमा भइरहेको छ।

केही दिनअघि मन्त्री पौडेलले अस्पतालमा गएर घाइते बालबालिकाको स्वास्थ्य अवस्थाबारे जानकारी लिँदै उपचारमा सरकारले पूर्ण सहयोग गर्ने प्रतिबद्धता जनाएका थिए। यसै सन्दर्भमा मन्त्रिपरिषद बैठकले मृतकका परिवारलाई राहत र घाइते बालबालिकाको उपचार खर्च सरकारले बेहोर्ने निर्णय गरेको हो।

• Jigyasa media