काठमाडौँ, साउन १७ — देशभर मनसुनी गतिविधि तीव्र बन्ने संकेत देखिएको छ। मनसुनको न्यूनचापीय रेखा नेपालतर्फ सर्दै गरेकोले आगामी तीन दिनसम्म लगातार मौसम बदली र वर्षा हुने सम्भावना उच्च रहेको जल तथा मौसम पूर्वानुमान महाशाखाले जनाएको छ।
महाशाखाकी मौसमविद् बिनु महर्जनका अनुसार अहिले पानी पार्ने प्रणाली (low pressure line) सामान्य अवस्थाभन्दा उत्तरतर्फ सरेको छ, जसले नेपालभर व्यापक प्रभाव पार्नेछ।
"मनसुनको न्यूनचापीय रेखा नेपालतर्फ झर्ने क्रममा छ," महर्जनले भनिन्, "त्यसैले आजदेखि सोमबारसम्म देशभर मौसम बदली र वर्षा बढ्ने प्रक्षेपण गरिएको छ।"
मधेस तथा तराई क्षेत्रमा पनि यसपटक पर्याप्त वर्षा हुने सम्भावना रहेको उनले बताइन्। उनका अनुसार गएराति पनि मधेसका केही स्थानमा भारी वर्षा भइसकेको छ।
महर्जनले पछिल्लो १० घण्टाको वर्षा मापनमा मधेसका एक–दुई ठाउँमा "भारी वर्षा" दर्ता भएको जानकारी दिइन्। हाल पनि देशका विभिन्न भूभागमा वर्षा जारी छ।
यसैबीच, शनिबार बिहान काठमाडौँ उपत्यकाका केही स्थानमा हल्का वर्षा भइरहेको उनले जनाइन्। दिनभर उपत्यकामा हल्कादेखि मध्यम वर्षा हुने सम्भावना रहेको मौसम विभागले जनाएको छ।
🚨 सावधानीका लागि सुझाव
वर्षा सक्रिय हुने भएकाले पहाडी र तराई क्षेत्रमा पहिरो, बाढी तथा डुबानको जोखिम बढ्न सक्ने अनुमान गरिएको छ।
सार्वजनिक यातायात, यात्रु तथा कृषिक्षेत्रले विशेष सतर्कता अपनाउन मौसमविद्हरूले आग्रह गरेका छन्।
-
Jigyasanepal
