काठमाडौं, माघ १७ – हाल देशमा पश्चिमी वायुको प्रभाव जारी रहेको जल तथा मौसम विज्ञान विभागले जनाएको छ। कोशी र गण्डकी प्रदेशका पहाडी क्षेत्रमा आंशिकदेखि सामान्य बदली रहेको छ भने अन्य अधिकांश भेगमा मौसम सफा छ।

तराईका विभिन्न स्थानमा बाक्लो हुस्सु लाग्दा जनजीवन प्रभावित भएको छ। विभागका अनुसार, आगामी २४ घण्टासम्म हुस्सु कायमै रहने सम्भावना छ, जसले यातायात, कृषि, स्वास्थ्य तथा हवाई उडानमा असर पार्न सक्ने भएकाले सतर्कता अपनाउन आग्रह गरिएको छ।

आज दिउँसो कोशी, बागमती, गण्डकी र कर्णाली प्रदेशका पहाडी क्षेत्रमा आंशिकदेखि सामान्य बदली रहनेछ। साथै, कोशी र गण्डकी प्रदेशका उच्च पहाडी तथा हिमाली क्षेत्रमा हल्का हिमपातको सम्भावना रहेको मौसमविद्हरूले बताएका छन्।

राति पनि देशका पहाडी भूभागमा आंशिक बदली रहने अनुमान गरिएको छ भने बाँकी क्षेत्रमा मौसम सफा रहनेछ। शुक्रबार बिहान तराईका धेरै स्थानमा बाक्लो हुस्सु लाग्ने भएकाले यात्रा गर्दा विशेष सावधानी अपनाउन अनुरोध गरिएको छ।

– जिज्ञासा नेपाल

• Jigyasa media