काठमाडौं । देशभर मनसुन सक्रिय रहेकाले आज अधिकांश भूभागमा आकाश बादलले ढाक्ने भएको छ । जल तथा मौसम पूर्वानुमान महाशाखाका अनुसार मनसुनको न्यूनचापीय रेखा सरदरभन्दा दक्षिणतिर सरिरहेको छ, जसका कारण कोशी, मधेश, वाग्मती, गण्डकी र लुम्बिनी प्रदेशका धेरै स्थानमा निरन्तर वर्षा भइरहेको छ ।

आज दिउँसो देशका अधिकांश भागमा साधारणतया बदली रहनेछ भने राति पनि यस्तै मौसमी अवस्था कायम रहने प्रक्षेपण गरिएको छ ।

महाशाखाले चेतावनी दिँदै कोशी, मधेश, वाग्मती र गण्डकी प्रदेशका पहाडी भूभागमा मध्यम वर्षाको सम्भावना रहेको र तीमध्ये केही स्थानमा भारी वर्षा समेत हुने अनुमान गरेको छ ।

भारी वर्षाका कारण पहिरो, गेग्रान बहाव (डेब्रिज फ्लो) को जोखिम उच्च हुने, ठूला तथा साना नदीनालाको पानीको सतह अचानक बढ्न सक्ने र यातायात अवरुद्ध हुने सम्भावना रहेको महाशाखाले जनाएको छ ।

त्यसैले यात्रु, स्थानीयवासी र सरोकारवाला सबैलाई उच्च सतर्कता अपनाउन, पूर्वतयारी गर्न र जोखिमयुक्त भूभागमा अनावश्यक आवतजावत नगर्न आग्रह गरिएको छ ।

• Jigyasanepal