काठमाडौं, साउन २८ । मौसम पूर्वानुमान महाशाखाले आज रातभर देशका धेरै भागमा वर्षा हुने र केही स्थानमा ‘भारीदेखि धेरै भारी वर्षा’को सम्भावना रहेको चेतावनी जारी गरेको छ।

बुधबार साँझसम्म देशभर आकाश पूर्ण रूपमा बदली छ। कोसी, बागमती, गण्डकी, लुम्बिनी र कर्णाली प्रदेशका विभिन्न स्थानमा मध्यम वर्षा भइरहेको छ। महाशाखाका अनुसार रातभर मौसम बदली रहने र वर्षा झन् तीव्र हुने अनुमान छ।

सबैभन्दा बढी जोखिमका क्षेत्रहरू

गण्डकी र लुम्बिनीका पहाडी भूभाग — केही स्थानमा भारीदेखि धेरै भारी वर्षा

लुम्बिनी र सुदूरपश्चिमका तराई भूभाग — एक-दुई स्थानमा धेरै भारी वर्षा

कर्णालीका पहाडी भूभाग — एक-दुई स्थानमा धेरै भारी वर्षा

संभावित जोखिमहरू

महाशाखाले भूक्षय, बाढी, पहिरो, गेग्रान बहाब, सहरी तथा तराई क्षेत्रमा डुबानको उच्च जोखिम चेतावनीसहित जनाएको छ। ठूला तथा साना नदी-नालामा पानीको सतह बढ्ने, दैनिक जनजीवन, कृषि, स्वास्थ्य, पर्यटन, निर्माण कार्य, सडक तथा हवाई यातायातमा समेत असर पर्न सक्ने भएकोले आवश्यक सतर्कता अपनाउन अनुरोध गरिएको छ।

वर्षाको मापन

हल्का वर्षा: १० मिमि भन्दा कम

मध्यम वर्षा: १०–५० मिमि

भारी वर्षा: ५०–१०० मिमि

धेरै भारी वर्षा: १००–२०० मिमि

अति भारी वर्षा: २०० मिमि भन्दा माथि

महाशाखाले पछिल्लो मौसमी अपडेट नियमित रूपमा लिन, सुरक्षित स्थानमा बस्न र जोखिमपूर्ण क्षेत्रबाट टाढा रहन सर्वसाधारणलाई विशेष अपिल गरेको छ।

• Jigyasanepal