काठमाडौँ, चैत २७ – डोमिनिकन रिपब्लिकको राजधानी सान्टो डोमिङ्गोस्थित ‘जेट सेट नाइटक्लब’ मा मंगलबार बिहान भएको भीषण दुर्घटनामा कम्तीमा ६६ जनाको ज्यान गएको छ भने १५० भन्दा बढी घाइते भएका छन्।
स्थानीय समयअनुसार बिहान आयोजित संगीत कार्यक्रमका क्रममा नाइटक्लबको छत अकस्मात भत्किँदा त्रासदीपूर्ण स्थिति सिर्जना भएको हो। उक्त समयमा लोकप्रिय मेरेंगु गायक रुबी पेरेज आफ्नो प्रस्तुति दिइरहेका थिए। उनी पनि भग्नावशेषमा फसेका थिए, यद्यपि जीवितै उद्धार गरिएको जनाइएको छ।
मृतकमध्ये डोमिनिकन रिपब्लिकका प्रान्तीय गभर्नर तथा पूर्वमेजर लिग बेसबल खेलाडी ५१ वर्षीय अक्टाभियो डोटेलको पनि मृत्यु भएको पुष्टि गरिएको छ। भग्नावशेषबाट उद्धारपछिअस्पताल लैजाँदै गर्दा बाटोमै उनको ज्यान गएको थियो।
दुर्घटनाको समयमा सयौँ दर्शक क्लबभित्र थिए। घटनास्थलमा करिब ४०० उद्धारकर्मी परिचालित रहेका छन्, जसले अझै पनि भग्नावशेषमा जीवित व्यक्तिहरूको खोजी गरिरहेका छन्। अधिकारीहरूका अनुसार मृतकको संख्या अझै बढ्न सक्ने अनुमान गरिएको छ।
बीबीसीसहितका अन्तर्राष्ट्रिय सञ्चारमाध्यमले घटनालाई डोमिनिकन रिपब्लिकको पछिल्लो समयको सबैभन्दा दुःखद सांगीतिक दुर्घटना भनेका छन्।
- Jigyasa media
