जेरुसलेम, कात्तिक ३०। हमासका वरिष्ठ अधिकारीले गाजामा युद्धविरामका लागि तयार रहेको बताउँदै अमेरिकी राष्ट्रपति डोनाल्ड ट्रम्पलाई इजरायलमाथि युद्ध अन्त्य गर्न दबाब दिन आग्रह गरेका छन्।

हमासको राजनीतिक ब्युरोका सदस्य बासेम नइमले भने, “यदि युद्धविराम प्रस्ताव इजरायललाई मान्य हुन्छ भने हामी युद्धविराम गर्न तयार छौँ। अमेरिकी प्रशासन र ट्रम्पले इजरायली सरकारलाई आक्रमण अन्त्य गर्न दबाब दिनुपर्छ।”

उनका अनुसार, गाजापट्टीबाट प्रस्तुत हुने कुनै पनि प्रस्तावले विस्थापितहरूको फिर्ती, कैदीहरूको आदानप्रदान, मानवीय सहायता, र पुनर्निर्माणको पहुँच सुनिश्चित गरे स्थायी युद्धविराम सम्भव हुनेछ।

कतारले मध्यस्थता निलम्बन गरेपछि प्रतिक्रिया

कतारले गाजाको युद्धविराम र बन्धक मुक्तिका लागि मध्यस्थता गर्न निलम्बन गरेको घोषणा गरेपछि नइमको यो टिप्पणी आएको हो। कतारले अक्टोबर ७ मा इजरायलमाथि हमासको आक्रमणपछि सुरू भएको युद्ध अन्त्यका लागि कूटनीतिक प्रयास गरिरहेको थियो।

इजरायल र गाजामा भारी क्षति

इजरायलमाथि हमासको आक्रमणमा १,२०६ जनाको मृत्यु भएको छ, जसमा अधिकांश सर्वसाधारण छन्। यसैगरी, गाजामा इजरायली प्रतिक्रियात्मक कारबाहीका कारण ४३,७६४ जनाको मृत्यु भएको हमास प्रशासित क्षेत्रका स्वास्थ्य मन्त्रालयले जनाएको छ। तीमध्ये धेरैजसो सर्वसाधारण रहेको पुष्टि भएको छ।

शान्ति प्रयासको चुनौती

डोनाल्ड ट्रम्पले आफ्नो चुनावी अभियानमा मध्यपूर्वमा शान्तिको वाचा गरेका थिए। तर, पछिल्लो हिंसा र वार्तामा देखिएको गम्भीरताकै अभावले शान्ति प्रक्रिया अझै अनिश्चित बनेको छ।

• RSS