कपिलवस्तु, चैत २३ — गहुँ भित्र्याउने तयारी भइरहेको बेला कपिलवस्तुका दुई स्थानमा एकै दिन आगलागी हुँदा किसानको मेहनत खरानी भएको छ।
यशोधरा गाउँपालिका–४ पोखरभिटवामा शनिबार दिउँसो गहुँ खेतमा अकस्मात लागेको आगोले २५ जना किसानको गहुँबाली नोक्सान पुर्याएको हो। स्थानीय हजरत अलीको खेतबाट सुरु भएको आगो छरछिमेकमा फैलिँदा १८ घरधुरीको खेतमा उब्जनी पर्खिरहेको गहुँबाली जलेर नष्ट भएको हो।
बीओपी डंगरीका सशस्त्र प्रहरी निरीक्षक नवराज देवकोटाका अनुसार, आगो नियन्त्रणका लागि दमकल, सुरक्षा निकाय र स्थानीयवासीहरूले संयुक्त प्रयास गरेका थिए। आगलागीबाट करिब ९ लाख ४२ हजार ५ सय रुपैयाँ बराबरको क्षति भएको प्रारम्भिक अनुमान छ। यद्यपि आगलागी कसरी सुरु भयो भन्ने स्पष्ट भइसकेको छैन।
त्यस्तै, कृष्णनगर नगरपालिका–७ अजिगरामा अभिषेक चौधरीको खेतबाट अर्को आगो फैलिँदा ८ जना किसानको गहुँबाली नष्ट भएको छ। यस आगलागीबाट करिब १ लाख ७१ हजार रुपैयाँको क्षति भएको जनाइएको छ।
पछिल्ला केही दिनयता कपिलवस्तुमा गहुँबालीमा आगलागीका घटनाहरू बढ्दै गएका छन्। प्रायः काट्न मात्र बाँकी रहेका पाकेका गहुँ खेतमा लाग्ने यस्ता आगोहरूले किसानको महिनौंको पसिना क्षणभरमै खरानी बनाइदिएको छ।
प्रशासनले सतर्कता अपनाउन किसानहरूलाई सचेत गराउने बताउँदै आएको छ भने आगलागीको कारण पत्ता लगाउन अनुसन्धान भइरहेको जनाएको छ।
- Jigyasa media
