काठमाडौँ, वैशाख १५। काठमाडौँ प्रहरीले ठूलो परिमाणको लागुऔषधसहित दुई जनालाई पक्राउ गरेको छ। जिल्ला प्रहरी परिसर, काठमाडौँका अनुसार पक्राउ पर्नेमा भोजपुरको पौवादुङमा गाउँपालिका–४ का ३५ वर्षीय जीवन प्रधान र सिन्धुपाल्चोकको सुनकोसी गाउँपालिका–३ का अकुंश तामाङ रहेका छन्। दुवै जना हाल काठमाडौँ महानगरपालिका–६, सिमलटारमा डेरा गरी बस्दै आएका थिए।

प्रहरीले आफ्नै कोठामा लागुऔषध बिक्री वितरण गर्ने गरेको सूचनाका आधारमा खटिएको टोलीले उनीहरूलाई पक्राउ गरेको हो। कोठा खानतलासी गर्दा प्रहरीले डाइजेपाम ३१४ एम्पुल, फेनरागन ३०८ एम्पुल, नुर्फिन ३१० एम्पुल, आईफोन र सामसुङ मोबाइल फोन एक–एक थान तथा नगद ५९ हजार ७५० रुपैयाँ बरामद गरेको जिल्ला प्रहरी परिसरका प्रवक्ता एसपी अपील राज बोहराले जानकारी दिए।

हाल पक्राउ परेकालाई काठमाडौँ जिल्ला अदालतबाट ५ दिनको म्याद थप गरी थप अनुसन्धान भइरहेको प्रहरीले जनाएको छ। प्रहरीले लागुऔषध कारोबारमा संलग्न अन्य व्यक्तिहरूको खोजी पनि तीव्र बनाएको जनाएको छ।

• Jigyasanepal