जिज्ञासा नेपाल | जेठ ३०, २०८२ | काठमाडौँ
भारतीय राज्य गुजरातको अहमदाबादमा बिहीबार दिउँसो भएको भीषण विमान दुर्घटनामा २४१ जनाको ज्यान गएको पुष्टि भएको छ। भारतको राष्ट्रिय ध्वजावाहक एयर इन्डियाको उडान AI171 दु:खद रूपमा दुर्घटनाग्रस्त हुँदा सवार २४२ यात्रुमध्ये एक जना मात्र जीवित रहेका छन्।
एयर इन्डियाले सामाजिक सञ्जाल एक्स (पूर्व ट्विटर) मार्फत जानकारी दिँदै २४२ यात्रु र चालक दलमध्ये २४१ जनाको मृत्यु भएको पुष्टिको जानकारी दिएको हो। दुर्घटनामा १२ जना चालक दलका सदस्यहरू पनि मृत्यु हुनेहरूको सूचिमा छन्।
एयर इन्डियाका अनुसार मृतक यात्रुहरूमा:
- 🇮🇳 १६९ भारतीय नागरिक
- 🇬🇧 ५३ बेलायती नागरिक
- 🇵🇹 १ जना पोर्चुगिज नागरिक
- 🇨🇦 १ जना क्यानेडियन नागरिक रहेका छन्।
बाँच्न सफल भएका एक जना यात्रु भारतीय मूलका बेलायती नागरिक भएको पुष्टि गरिएको छ। हाल ती जीवित यात्रुको उपचार भइरहेको जनाइएको छ।
दुर्घटनाको कारणबारे विस्तृत विवरण आउन बाँकी रहे पनि प्रारम्भिक रिपोर्टहरूले प्राविधिक त्रुटि वा अवतरणका बेला भएको समस्या हुनसक्ने आशंका जनाएका छन्। दुर्घटनास्थलमा उद्धार कार्यमा भारतीय वायुसेना, राष्ट्रिय विपद् प्रतिक्रिया बल (NDRF), र स्थानीय प्रशासन सक्रिय रुपमा खटिएका छन्।
भारतीय प्रधानमन्त्री नरेन्द्र मोदीसहित विभिन्न देशका नेताहरूले यस दुखद दुर्घटनाप्रति गहिरो दुःख व्यक्त गर्दै मृतकप्रति श्रद्धाञ्जलि अर्पण गरेका छन्।
एयर इन्डियाले पीडित परिवारसँग समन्वय गरी राहत र सहायता प्रदान गर्ने बताएको छ भने दुर्घटनाको पूर्ण छानबिनका लागि समिति गठन गरिने जनाइएको छ।
-
Jigyasanepal
