काठमाडौं – पाकिस्तानको उत्तरपश्चिमी क्षेत्र, विशेष गरी कुर्रम जिल्लामा जारी साम्प्रदायिक हिंसामा मृत्यु हुनेको सङ्ख्या ३७ पुगेको छ, जबकि १५० भन्दा बढी व्यक्ति घाइते भएका छन्। स्थानीय अधिकारीहरूले शुक्रबार यसबारे जानकारी दिएका छन्।

कुर्रम जिल्लामा शिया र सुन्नी जनजातिबीचको पुरानो विवादलाई लिएर बारम्बार हिंसात्मक मुठभेड हुँदै आएको छ। हालको झडप भूमि विवादबाट सुरु भएर साम्प्रदायिक रक्तपातमा परिणत भएको बताइन्छ। यस क्रममा स्वचालित हतियार र मोर्टारजस्ता खतरनाक हतियारहरूको प्रयोग भएको छ।

सुरक्षा बल र स्थानीय समुदायले शान्ति कायम गर्न विभिन्न प्रयास गरे तापनि, झडपहरू रोकिएका छैनन्, र हाल १० भन्दा बढी क्षेत्रमा हिंसा फैलिएको छ। जुलाई महिनामा पनि यस्तै झडपका कारण ३५ जनाको मृत्यु भएको थियो, जुन अन्ततः जिरगा (आदिवासी संगठन) को हस्तक्षेपपछि शान्त भएको थियो।

पाकिस्तानको यस क्षेत्रमा बारम्बार जातीय द्वन्द्व र आदिवासी कलहको कारणले ठूलो संख्यामा नागरिकहरूको ज्यान गुम्ने गरेको छ। विशेष गरी सुन्नी बहुल देश पाकिस्तानमा शिया समुदायले लामो समयदेखि भेदभाव र हिंसा भोग्दैआएको छ।

• Jigyasa media