काठमाडौं - केही दिनअघि परेको अविरल वर्षापछि आएको बाढी र पहिरोको कारण उद्धार कार्यमा खटिएका नेपाली सेनाका एक प्रमुख सेनानीसहित तीन जनाको निधन भएको छ।

सैनिक जनसम्पर्क तथा सूचना निर्देशनालयका अनुसार सिन्धुपाल्चोकको सुनकोशी गाउँपालिका–४ मा पहिरोले पुरिएकाहरूको उद्धार गर्न खटिएका प्रमुख सेनानी मिलन केसीको ज्यान गएको हो। यस घटनामा उद्धारको कर्तव्य पालनाको क्रममा उनी शहीद भएका थिए।

यस्तै, दोलखाको बिगु गाउँपालिका–१ लामा बगरस्थित माथिल्लो तामाकोशी जलविद्युत् आयोजनामा सुरक्षार्थ खटिएका अमलदार नरेन्द्रबहादुर पाल र प्युठ शङ्कर चन्दको पनि निधन भएको छ। बाढीपहिरोका कारण उनीहरूको ज्यान गएको सैनिक निर्देशनालयले जानकारी दिएको छ। साथै, एक जना भूपू हवल्दारको पनि मृत्यु भएको पुष्टि गरिएको छ, यद्यपि उनको वतन भने खुलाइएको छैन।

सैनिक निर्देशनालयले बाढीपहिरोका कारण सेनाका केही व्यारेकमा पनि क्षति पुगेको बताएको छ। घटनालगत्तै नेपाली सेना प्रभावित क्षेत्रमा तत्कालै परिचालित भई खोज, उद्धार, र राहत सामग्री वितरण कार्यमा निरन्तर सक्रिय रहेको छ।

बाढीपहिरोबाट विस्थापित भएकाहरूलाई सुरक्षित स्थानमा स्थानान्तरण गर्न र तत्काल राहत पुर्याउन सेना सक्रियताका साथ काम गरिरहेको छ।

• Jigyasa media