बागलुङ – निसीखोला गाउँपालिका–६ को सिंवाद्वार क्षेत्रमा लागेको डढेलो अहिलेसम्म नियन्त्रणमा आउन सकेको छैन। शुक्रबार दिउँसो २ बजे सुरु भएको आगलागी झन् फैलिँदै गएकाले स्थानीयवासी चिन्तित बनेका छन्।
सिंवाद्वार, सीप, तिग्रापानी, कोस्काँ, र सुन क्षेत्रका सामुदायिक वनमा फैलिएको डढेलोका कारण त्यहाँ रहेका एक सयभन्दा बढी भेडीगोठ जोखिममा परेका छन्।
डढेलो नियन्त्रणका लागि स्थानीयवासी र निसी प्रहरी चौकीबाट टोली परिचालित भए पनि कठिनाइ भोग्नु परेको गाउँपालिका अध्यक्ष सूर्यबहादुर घर्ती मगरले बताए। ‘डढेलो लागेको क्षेत्र भेडाचरनको लागि प्रयोग गरिन्छ, त्यहाँ हजारौं भेडाबाख्रा छन्, जुन आगलागीको उच्च जोखिममा छन्,’ उनले भने।
डढेलोको कारण अझै पत्ता लाग्न सकेको छैन। लगातार हावा चलिरहेकाले आगो नियन्त्रण गर्न कठिन भइरहेको स्थानीयहरूले बताएका छन्।
- Jigyasa media
