डडेल्धुरा। डडेल्धुराको अमरगढी नगरपालिका–७, खसरेखान क्षेत्रमा शनिबार बिहान भएको जिप दुर्घटनामा दुई जनाको ज्यान गएको छ भने तीन जना घाइते भएका छन्।
जिल्ला प्रहरी कार्यालय डडेल्धुराका प्रमुख प्रहरी नायब उपरीक्षक (डीएसपी) बरुणबहादुर सिंहका अनुसार धनगढीबाट दार्चुलातर्फ जाँदै गरेको सुपप्र ०१–००१ ज १८५० नम्बरको बोलेरो जिप अनियन्त्रित भई करिब ५०० मिटर तल खसेपछि दुर्घटना भएको हो।
दुर्घटनामा दार्चुलाको अपिहिमाल गाउँपालिका–१ निवासी २५ वर्षीय शुभम लोथ्याल र २० वर्षीय हुम लोथ्यालको घटनास्थलमै मृत्यु भएको प्रहरीले जनाएको छ।
जिपमा सवार अन्य तीन जना घाइते भएका छन्। घाइतेहरूको डडेल्धुरा अस्पतालमा उपचार भइरहेको छ। उनीहरूको स्वास्थ्य अवस्थाबारे थप विवरण आउन बाँकी रहेको प्रहरीले जनाएको छ।
दुर्घटनाको कारण खुल्न बाँकी रहेको भन्दै प्रहरीले घटनाबारे आवश्यक अनुसन्धान अघि बढाएको छ।
-
Jigyasanepal
