काठमाडौंमा साँझपख हल्का वर्षा हुन सक्ने, उच्च हिमाली क्षेत्रमा हिमपातको पूर्वानुमान

काठमाडौं, जेठ २६ । उपल्लो वायुमण्डलमा रहेको पश्चिमी न्यूनचापीय रेखा तथा स्थानीय वायुको आंशिक प्रभावका कारण मंगलबार देशका विभिन्न पहाडी तथा हिमाली क्षेत्रमा वर्षा र हिमपातको सम्भावना रहेको छ। मौसम पूर्वानुमान महाशाखाका अनुसार तराईका केही क्षेत्रमा भने तातो दिनको अवस्था कायम रहने देखिएको छ।

आज बिहान कोसी प्रदेशसहित लुम्बिनी, कर्णाली र सुदूरपश्चिम प्रदेशका हिमाली क्षेत्रमा सामान्यदेखि आंशिक बदली रहेको छ भने बाँकी पहाडी क्षेत्रमा आंशिक बदली र तराईका अधिकांश भूभागमा मौसम मुख्यतः सफा रहेको छ। कोसी प्रदेशका केही स्थानमा हल्का वर्षासमेत भइरहेको छ।

महाशाखाका अनुसार दिउँसो कोसी, मधेस, बागमती, गण्डकी, लुम्बिनी, कर्णाली र सुदूरपश्चिम प्रदेशका हिमाली तथा पहाडी भूभागमा साधारणतया बदली रहनेछ। यी प्रदेशका थोरै स्थानमा मेघगर्जन तथा चट्याङसहित हल्कादेखि मध्यम वर्षा हुन सक्ने सम्भावना छ। उच्च पहाडी तथा हिमाली क्षेत्रमा हिमपातको सम्भावना पनि रहेको छ।

यस्तै बागमती, गण्डकी, लुम्बिनी र सुदूरपश्चिम प्रदेशका तराई भूभागका केही स्थानमा तातो दिनको अवस्था रहने मौसमविद्हरूले बताएका छन्।

काठमाडौंमा साँझपख वर्षाको सम्भावना

मौसमविद् डेभिड ढकालका अनुसार मंगलबार बिहान काठमाडौं उपत्यकाको मौसम मुख्यतः सफा रहे पनि दिउँसोपछि बिस्तारै बदली बढ्नेछ। अपराह्न ४ बजेपछि वा साँझपख क्षणिक तथा हल्का वर्षा हुन सक्ने सम्भावना रहेको उनले बताए।

आज काठमाडौं उपत्यकाको अधिकतम तापक्रम २९ देखि ३१ डिग्री सेल्सियससम्म पुग्ने अनुमान गरिएको छ। सोमबार उपत्यकाको अधिकतम तापक्रम ३०.३ डिग्री र न्यूनतम तापक्रम १९.८ डिग्री सेल्सियस मापन गरिएको थियो।

राति पनि वर्षाको सम्भावना

राति कोसी, बागमती र गण्डकी प्रदेशका हिमाली तथा पहाडी भूभागका थोरै स्थान तथा मधेस, लुम्बिनी, कर्णाली र सुदूरपश्चिम प्रदेशका केही स्थानमा मेघगर्जन तथा चट्याङसहित हल्का वर्षा हुन सक्ने सम्भावना रहेको महाशाखाले जनाएको छ। उच्च हिमाली क्षेत्रमा हिमपातको सम्भावना कायमै रहनेछ।

वर्षाको मापन कसरी गरिन्छ?

मौसमविद्का अनुसार २४ घण्टामा १० मिलिमिटरभन्दा कम वर्षा भए हल्का वर्षा, १० देखि ५० मिलिमिटरसम्म मध्यम वर्षा, ५० देखि १०० मिलिमिटरसम्म भारी वर्षा मानिन्छ। १०० देखि २०० मिलिमिटरसम्म धेरै भारी तथा २०० मिलिमिटरभन्दा बढी वर्षा भए अति भारी वर्षा भएको मानिन्छ।

त्यसैगरी मौसम पूर्वानुमानमा प्रयोग हुने ‘एक–दुई स्थान’, ‘थोरै स्थान’, ‘केही स्थान’, ‘धेरै स्थान’ र ‘अधिकांश स्थान’ शब्दले क्रमशः १० प्रतिशतभन्दा कमदेखि ८० प्रतिशतभन्दा बढी भूभागमा वर्षा हुने सम्भावनालाई जनाउने मौसमविद्हरू बताउँछन्।

मनसुन सक्रिय हुने तयारीमा रहेकाले पहाडी तथा हिमाली क्षेत्रका बासिन्दालाई सतर्कता अपनाउन र मौसमसम्बन्धी अद्यावधिक जानकारी नियमित रूपमा लिन मौसमविद्हरूले आग्रह गरेका छन्।

• Jigyasanepal