काठमाडौं, वैशाख २५ — यस वर्षको माध्यमिक शिक्षा परीक्षा (एसईई) को नतिजा अब केही दिनमै सार्वजनिक हुने भएको छ। राष्ट्रिय परीक्षा बोर्ड अन्तर्गत परीक्षा नियन्त्रण कार्यालय कक्षा–१० ले नतिजा प्रकाशनको अन्तिम तयारी भइरहेको जनाएको छ।

परीक्षा नियन्त्रक तुकराज अधिकारी का अनुसार वैशाख २७ गतेपछि जुनसुकै दिन नतिजा सार्वजनिक हुन सक्नेछ। उनले वैशाख ३० गतेभन्दा ढिलो नहुने स्पष्ट पारे।

उनले नेपालखबरसँग कुरा गर्दै “एसईईको रिजल्ट सार्वजनिक गर्न आवश्यक अन्तिम गृहकार्य भइरहेको छ। नतिजा प्रशासित गर्ने विषयमा आज पनि विभिन्न पक्षसँग छलफल गरिएको छ,” बताएका छन्।

शिक्षा मन्त्रालय ले पनि वैशाखभित्रै नतिजा सार्वजनिक गर्न बोर्डलाई निर्देशन दिएको छ।

यस वर्षको एसईई परीक्षा चैत १९ गतेदेखि सुरु भएर चैत २९ गते सम्पन्न भएको थियो। परीक्षामा कुल ५ लाख १२ हजार ४२१ विद्यार्थी सहभागी भएका थिए। तीमध्ये नियमिततर्फ ४ लाख ४१ हजार ५६६ तथा ग्रेड वृद्धितर्फ ७० हजार ८५५ विद्यार्थी रहेको बोर्डले जनाएको छ।

अघिल्ला वर्षहरूमा एसईईको नतिजा सार्वजनिक हुन करिब तीन महिना लाग्ने गरेको थियो। तर यसपटक सरकारले परीक्षा सम्पन्न भएको करिब एक महिनामै नतिजा ल्याउने तयारी गरेको हो।

गत वर्ष चैत दोस्रो सातामा परीक्षा सकिए पनि नतिजा असार १३ गते मात्र प्रकाशित भएको थियो। यस वर्ष भने नतिजा छिटो सार्वजनिक हुने भएपछि विद्यार्थी र अभिभावकमा उत्सुकता बढेको छ।

• Jigyasanepal