चैत्र ३१, २०८१, आइतबार | काठमाडौँ ।शनिबार राति सम्पन्न इन्डियन प्रिमियर लिग (आईपीएल) को रोमाञ्चक खेलमा सनराइजर्स हैदराबादले पन्जाब किंग्सलाई ८ विकेटले पराजित गर्दै शानदार जित दर्ता गरेको छ।
२४६ रनको विशाल लक्ष्य पछ्याउँदै मैदानमा उत्रिएको हैदराबादका लागि अभिषेक शर्माले अद्भुत ब्याटिङ प्रदर्शन गरे। उनले मात्र ५५ बलमा १४ चौका र १० छक्कासहित १४१ रनको विस्फोटक इनिङ खेले। उनलाई अर्शदीप सिंहले आउट गरे पनि त्यो बेलासम्म हैदराबाद सहज जीतको बाटोमा अघि बढिसकेको थियो।
१८.३ ओभरमै लक्ष्य भेट्दै हैदराबादले पन्जाबमाथि ८ विकेटको प्रभावशाली जित हात पार्यो।
यसअघि टस जितेर पहिला ब्याटिङ रोजेको पन्जाबले पनि उत्कृष्ट प्रदर्शन गर्दै निर्धारित २० ओभरमा ६ विकेटको क्षतिमा २४५ रन बनाएको थियो। श्रेयस अय्यरको अर्धशतक र मार्कस स्टोइनिसको आक्रामक ब्याटिङ पन्जाबको पारीको आधार रह्यो। यो स्कोर पन्जाबको आईपीएल इतिहासको दोस्रो उच्च योगफल पनि हो।
बलिङतर्फ हैदराबादका हर्षल पटेलले ४ विकेट लिएर विपक्षी ब्याट्सम्यानहरूलाई दबाबमा राख्न सफल भए। इशान मालिङाले २ विकेट लिएर उनलाई साथ दिए।
अभिषेक शर्माको ऐतिहासिक प्रदर्शनले हैदराबादलाई न केवल जित दिलायो, बरु आगामी खेलमा मनोबलसमेत उच्च बनाएको छ। यता, पन्जाबका लागि भने बलिङतर्फ पुनर्विचार गर्नुपर्ने अवस्था देखिएको छ।
- Jigyasa media
