कात्तिक १४, काठमाडौं – आइसिसी पुरुष क्रिकेट विश्वकप लिग–२ अन्तर्गत अमेरिकामा भएको त्रिकोणात्मक शृङ्खलाको खेलमा नेपालले स्कटल्याण्डलाई ५ विकेटले पराजित गरेको छ।
अमेरिकाको डालसस्थित ग्रान्ड प्रेरि स्टेडियममा सम्पन्न खेलमा टस जितेर स्कटल्याण्डले ब्याटिङ रोज्यो। तर नेपालका बलरहरूको कडाइका कारण ४१.४ ओभरमा सबै विकेट गुमाएर केवल १५४ रनमै सिमित रह्यो। स्कटल्याण्डको तर्फबाट मार्क वाटले ३४ रन बनाए, भने अन्य ब्याटरले उल्लेखनीय योगदान दिन सकेनन्। नेपालका सन्दीप लामिछानेले उत्कृष्ट प्रदर्शन गर्दै ३ विकेट लिए भने, करन केसी, सोमपाल कामी र गुल्शन झाले २/२ विकेट तथा आरिफ शेखले १ विकेट लिएर स्कटल्याण्डलाई सस्तोमा समेटे।
नेपालले १५५ रनको लक्ष्यलाई २९.५ ओभरमा ५ विकेटको क्षतिमा पूरा गर्दै खेल जित्यो। नेपालका लागि आरिफ शेखले उत्कृष्ट प्रदर्शन गर्दै ५१ रन बनाए। कुशल भुर्तेल र गुल्शन झाले २५/२५ रनको योगदान दिए भने आसिफ शेखले २१ रन बनाए।
स्कटल्याण्डका ब्राण्डम म्याकुलमले २ विकेट हात पारे भने ब्राड कुरी, मार्क वाट र ज्याक जार्विसले समान १/१ विकेट लिए।
यसअघि, त्रिकोणात्मक शृङ्खलाको पहिलो खेलमा नेपाल अमेरिकासँग ३ विकेटले पराजित भएको थियो, जबकि स्कटल्याण्डले अमेरिकालाई १० विकेटले पराजित गर्दै सशक्त शुरुवात गरेको थियो।
- Jigyasa media
