जिज्ञासा संवाददाता, वीरगन्ज | वैशाख ९, २०८२

एक वर्षअघि वीरगन्जमा बिहेको मण्डपमै बेहुलाले सुनको सिक्री नपाएको भन्दै विवाह तोडेका घटना अहिले कानुनी निष्कर्षमा पुगेको छ। दाइजोको नाममा अत्यधिक माग राखी विवाह भाँडेको अभियोगमा पर्सा जिल्ला अदालतले बेहुलासहित पाँच जनालाई ६–६ महिनाको कैद सजाय सुनाएको छ।

के भयो घटनाको सिलसिला?

२०७९ फागुन २८ गते वीरगन्ज महानगरपालिका–२४, रामगढवामा बेहुलीको घरमा विवाहको माहोल थियो। विधिपूर्वक विवाह कार्यक्रम चलिरहेको बेला बेहुला उमेश साहले दाइजोमा सुनको सिक्री मागे। माग अस्वीकृत भएपछि विवाद चर्कियो, कुटपिटसम्मको अवस्था आयो र अन्ततः उमेशले विवाह अस्वीकार गर्दै मण्डप छाडे।

अदालतको फैसला

न्यायाधीश मोहन सुवेदीको एकल इजलासले बेहुला बाराको कलैया–४ का २८ वर्षीय उमेश साह, उनका बुबा बच्चालाल साह (६०), दाजुहरू राकेश कुमार साह (४२), मुकेश कुमार साह (४०) र भिनाजु रामएकबाल साह (४५) लाई विवाहसम्बन्धी कसूरमा दोषी ठहर गर्दै जनही ६/६ महिना कैद र ५/५ हजार रुपैयाँ जरिवाना फैसला सुनाएको हो।

दाइजोको रकम फिर्ता गर्ने आदेश

अदालतले बेहुली पक्षबाट दाइजोस्वरूप लिएको पाँच लाख ६५ हजार रुपैयाँ रकम समेत फिर्ता गर्न आदेश दिएको छ।

न्यायको सन्देश

यो फैसला दाइजोको गलत परम्परा र विवाहको नाममा हुने आर्थिक शोषणविरुद्ध एक कडा सन्देश हो। सामाजिक रूपमा कुरीति बनेको दाइजोप्रथा अन्त्य गर्न कानुनले यस्तो ऐतिहासिक कदम चालेको भन्दै पीडित पक्षले सन्तोष व्यक्त गरेको छ।

• H