काठमाडौं, चैत २८ । देशका विभिन्न भू–भागमा वर्षा भइरहेको छ। जल तथा मौसम विज्ञान विभागका अनुसार पछिल्लो केही घण्टादेखि देशभर सामान्यदेखि पूर्ण बदलीको अवस्था रहेको र विभिन्न स्थानमा मेघगर्जन र चट्याङसहित हल्कादेखि मध्यम तथा एकदुई स्थानमा भारी वर्षा भएको छ।
विभागका मौसमविद् रोजन लामिछानेका अनुसार हाल कोसी, मधेस, वाग्मती, गण्डकी र लुम्बिनी प्रदेशमा सक्रिय मौसमी प्रणालीका कारण निरन्तर वर्षा भइरहेको हो। बाँकी प्रदेशहरूमा पनि छिटपुट रूपमा वर्षा भइरहेको छ।
१२ घण्टा यताका प्रमुख वर्षायुक्त क्षेत्रहरू
पछिल्लो १२ घण्टाको वर्षा विवरणअनुसार सबैभन्दा धेरै वर्षा इलाम, सर्लाही, पर्सा, रौतहट र सप्तरीमा मापन गरिएको छ। यद्यपि यी क्षेत्रमा हाल वर्षाको तीव्रता केही घटेको छ।
उपत्यकामा कीर्तिपुर अगाडि
काठमाडौं उपत्यकामा आज बिहानदेखि नै हल्का वर्षा जारी छ। बिहान ७ देखि ८ बजेसम्मको एक घण्टाको अवधिमा उपत्यकामा चार मिलिमिटर वर्षा मापन गरिएको थियो। पछिल्लो ६ घण्टाको तथ्यांकअनुसार कीर्तिपुरमा सबैभन्दा धेरै २६.३ मिलिमिटर वर्षा मापन गरिएको छ।
अन्य क्षेत्रहरूको विवरण यसप्रकार छ:
बबरमहल : ८.२ मिमी
ललितपुरको गोदावरी : १५ मिमी
टीकाथली : ५.५ मिमी
साँखु : १.६ मिमी
सुन्दरीजल : २.८ मिमी
पाँचपोखरी : ७.२ मिमी
मौसमविद् लामिछानेका अनुसार काठमाडौं उपत्यकामा दिनभर केही समय पानी पर्ने र केही समय रोकिने क्रम जारी रहनेछ।
वर्षाको प्रमुख कारण– पश्चिमी, स्थानीय वायु र बंगालको असर
हाल नेपालमा पश्चिमी वायु, स्थानीय वायु तथा बंगालको खाडीबाट भित्रिएको जलवाष्पयुक्त हावाको संयुक्त प्रभाव छ। यही मौसमी प्रणालीका कारण देशभर वर्षा भइरहेको विभागले जनाएको छ।
- Jigyasa media
