सिरहा, असोज ९ – सिरहाको औरही गाउँपालिका-३ खजनपुर टोलमा छोराको कुटपिटबाट ६५ वर्षीय भालेश्वर यादवको मृत्यु भएको छ।

जिल्ला प्रहरी कार्यालय सिरहाका अनुसार, सोमबार साँझ घरेलु विवादको क्रममा भालेश्वर यादवमाथि उनका छोरा ३८ वर्षीय शैलेन्द्रकुमार यादव र बुहारी रेणुकुमारी यादवले कुटपिट गरेका थिए। गम्भीर घाइते भएका भालेश्वरलाई प्राथमिक उपचारका लागि सिरहाको प्रादेशिक अस्पतालमा भर्ना गरिएको थियो। थप उपचारका लागि विराटनगरको नोबेल अस्पताल लैजाने क्रममा राति ११:४० बजे बाटोमै उनको मृत्यु भएको जिल्ला प्रहरी प्रवक्ता डिएसपी मुक्ति सापकोटाले जानकारी दिए।

घटनापछि प्रहरी चौकी औरहीबाट खटिएको टोलीले शैलेन्द्र यादवलाई नियन्त्रणमा लिएको छ। मृतक भालेश्वर यादवको शव मंगलबार पोष्टमार्टमपछि उनका अर्का छोरा रामप्रताप यादवलाई जिम्मा लगाइएको छ।

प्रहरीले शैलेन्द्र यादवविरुद्ध कर्तव्य ज्यान मुद्दामा पाँच दिनको म्याद थप गरी अनुसन्धान अघि बढाएको छ।

• Jigyasa media