मोरङ, फागुन २० – मोरङको पथरीशनिश्चरे नगरपालिका–५ मौलीबारीस्थित बक्राहा खोला किनारमा युवक र युवतीको शव झुन्डिएको अवस्थामा फेला परेको छ।

स्थानीय पिठारीको रुखमा एउटै डोरीले पासो लागेको अवस्थामा मृत भेटिनेहरू सोही ठाउँका करिब २४ वर्षीय अजय टुडू र झापाको गौरीगञ्ज गाउँपालिका–२ की जुबामुनी हस्ता रहेको जिल्ला प्रहरी कार्यालय मोरङले जनाएको छ।

प्रहरीका अनुसार दुवै जना विवाहित रहेको र जुबामुनीका पति वैदेशिक रोजगारीमा रहेको पत्ता लागेको छ। त्यस्तै, मृतक अजयका पनि दुई सन्तान रहेको बुझिएको छ।

अनुसन्धानको क्रममा आइतबार राति अजयले जुबामुनीलाई आफ्नै घर लगेका थिए। भोलिपल्ट उनीहरू घरबाट बाहिरिएका थिए भने मंगलबार बिहान बक्राहा खोला किनारमा उनीहरू मृत भेटिएको प्रहरीको भनाइ छ।

घटनाबारे प्रारम्भिक अनुसन्धानमा प्रहरीको आशंका अनुसार सम्बन्धका कारण उत्पन्न तनावले उनीहरू आत्महत्या गर्न पुगेको हुन सक्ने देखिन्छ। यद्यपि, घटनाको विस्तृत अनुसन्धान जारी रहेको छ।

• Jigyasa media