बझाङ ।बझाङ जिल्लामा भएका दुई छुट्टाछुट्टै जिप दुर्घटनामा चालकसहित पाँचजनाले ज्यान गुमाएका छन्।

पहिलो दुर्घटना बिहीबार राति तलकोट गाउँपालिका–२ सुकगाडमा भएको हो। उक्त दुर्घटनामा से १ ज ८४३ नम्बरको जिप सडकबाट झन्डै २०० मिटर तल खस्दा चालकसहित चारजनाको मृत्यु भएको छ। मृतकमध्ये चालक केदारस्युँ गाउँपालिका–१ रायलका ३३ वर्षीय शम्शेर मल्ल, तलकोट गाउँपालिका–४ का ३६ वर्षीय बम बहादुर धामी, ७२ वर्षीया जोगेनी देवी धामी र पाँच वर्षीया आकृती धामी छन्।

तीनजनाको घटनास्थलमै मृत्यु भएको थियो भने गम्भीर घाइते अवस्थाको पाँच वर्षीया आकृती धामीलाई उपचारका लागि सदरमुकाम ल्याउँदै गर्दा बाटोमै ज्यान गएको प्रहरीले जनाएको छ। जिप तलकोट गाउँपालिकाबाट चैनपुरतर्फ आउँदै गर्दा दुर्घटनामा परेको हो।

दोस्रो दुर्घटना त्यही राति करिब ९ बजेतिर कोटदेवल भन्ने स्थानमा भएको हो। सुदूरपश्चिम प्रदेश ०१–००१ ज १३९८ नम्बरको जिप मष्टा गाउँपालिकाको भातेखोलाबाट रनाडातर्फ जाँदै गर्दा दुर्घटनामा परेको थियो। यस दुर्घटनामा जिपका चालक ४२ वर्षीय धर्म थापाको घटनास्थलमै मृत्यु भएको छ।

जिप दुर्घटनाहरूका कारण स्थानीयवासी र प्रहरीले उद्धारमा खटिएका थिए। घटनाको विस्तृत अनुसन्धान भइरहेको जिल्ला प्रहरी कार्यालयले जनाएको छ।

सुरक्षा सचेतना: स्थानीय अधिकारीहरूले यात्रुहरूलाई सावधानी अपनाउन र चालकलाई सडकको अवस्थाबारे सतर्क रहन आग्रह गरेका छन्। बझाङका ग्रामीण क्षेत्रमा जोखिमपूर्ण सडकका कारण दुर्घटनाको सम्भावना उच्च हुने भन्दै तत्काल सुधारको आवश्यकता रहेको छ।

• Jigyasa media