धनगढी, ११ असोज: भारतमा रोजगारी गर्दै आएका बैतडीको पुर्चौडी नगरपालिका-५ कुवाकोट निवासी ३३ वर्षीय अमर धामी दशैं मनाउन घर फर्किंदै गर्दा महाकाली नदीमा खसेर बेपत्ता भएका छन्। घटना शुक्रबार बिहान दशरथचन्द नगरपालिका-८ झुलाघाट बजार नजिक भएको हो। धामी सडकमा हिँड्ने क्रममा चिप्लिएर नदीमा खसेका हुन्।
सुदूरपश्चिम प्रदेशका डीआईजी रविन्द्र केसीका अनुसार, धामी झुलाघाटबाट बैतडी सदरमुकाम जाने क्रममा सडकको पार्किङ क्षेत्रमा चिप्लिएर महाकालीमा खसेका थिए। पहिरो खस्ने जोखिमका कारण खोजी कार्यमा चुनौती आएपनि नेपाल प्रहरी, सशस्त्र प्रहरी र नेपाली सेनाको टोलीले उद्धार प्रयास जारी राखेको छ। धामीको अवस्था हालसम्म अज्ञात छ।
- Jigyasa media
