काठमाडौँ, कार्तिक १७ – यस वर्षको तिहारको भाइटीकामा हल्कादेखि मध्यम वर्षा हुने सम्भावना रहेको जल तथा मौसम विज्ञान विभागको मौसम पूर्वानुमान महाशाखाले जनाएको छ। भाइटीकाको दिन आइतबार केही स्थानमा मौसम बदली भई हल्का वर्षा हुनसक्ने मौसमविद् सञ्जिव अधिकारीले बताएका छन्। विशेषगरी कोशी प्रदेशको पहाडी क्षेत्र, तराईका केही भू–भाग, बागमती र गण्डकी प्रदेशका पहाडी भागहरूमा क्षणिक वर्षा हुने अनुमान छ।

देशभर पश्चिमी र स्थानीय वायुको प्रभाव रहेकाले शनिबार साँझसम्म पनि बागमती र गण्डकी प्रदेशका पहाडी भागमा मेघ गर्जन र हल्का वर्षाको सम्भावना रहेको छ। विभागले उच्च पहाडी तथा हिमाली क्षेत्रमा हल्का हिमपातको पनि पूर्वानुमान गरेको छ। कृषि, पर्यटन, स्वास्थ्य, पर्वतारोहण र यातायातमा यसले आंशिक असर पुर्याउन सक्ने भएकाले सतर्कता अपनाउन अनुरोध गरिएको छ।

सातापछि चिसो बढ्ने सम्भावना

जलवायु तथा विपद् व्यवस्थापनविद् डा. धर्मराज उप्रेतीका अनुसार आगामी एक सातापछि, विशेष गरी नोभेम्बर ९ पछि, उपत्यकालगायत देशभर चिसो बढ्ने सम्भावना छ। तापक्रम ३ डिग्री सेल्सियससम्म घट्ने अनुमान गरिएको छ। अहिले नै केही स्थानमा हल्का वर्षा भई चिसो सुरु भएको छ।

साथै, चिसो बढेसँगै दम, रुघाखोकी, र ज्वरोलगायत समस्याहरू देखा पर्न सक्ने भएकाले जनस्वास्थ्यविद्हरुले सतर्क रहन सुझाव दिएका छन्।

• Jigyasa media