**काठमाडौं**: प्रहरीले ६ किलो २४ ग्राम अवैध लागुऔषध कोकिनसहित एक जना विदेशी नागरिकलाई पक्राउ गरेको छ। कतार एयरवेजको उडानद्वारा नेपाल आएका लाटभियाका नागरिक इभ्रस भलटेर्सलाई त्रिभुवन अन्तर्राष्ट्रिय विमानस्थल भन्सार कार्यालयको आगमन कक्षबाट लागूऔषध नियन्त्रण ब्यूरोबाट खटिएको प्रहरीले पक्राउ गरेको हो।

सुटकेसभित्र लुकाई–छिपाई राखेको उक्त परिणामको कोकिनसहित लाटभियाका नागरिकलाई पक्राउ गरिएको प्रहरी प्रवक्ता प्रहरी नायब महानिरीक्षक दानबहादुर कार्कीले जानकारी दिए। बुधबार पक्राउ परेका निजमाथि लागुऔषध मुद्दामा जिल्ला अदालत काठमाडौंबाट म्याद थप अनुमति लिई आवश्यक अनुसन्धान भइरहेको उनले बताए।

**गोंगबु र नरेफाँटबाट लागुऔषधसहित चार जना पक्राउ**

यसैबीच, प्रहरीले काठमाडौंको गोंगबुस्थित नयाँ बसपार्कबाट अवैध लागुऔषध खैरो हेरोइन १५ ग्राम पाँच सय मिलिग्राम, नगद रु ४० हजार र तीन थान मोबाइलसहित दुई जनालाई पक्राउ गरेको छ। सप्तरी राजविराज नगरपालिका–९ का २४ वर्षीय पवनकुमार मेहता र उदयपुर त्रियुगा नगरपालिका–७ का २७ वर्षीय अनिल परियार पक्राउ परेका हुन्।

काठमाडौंको नरेफाँटबाट अवैध लागुऔषध खैरो हेरोइन ६४० मिलिग्राम र दुई थान मोबाइलसहित दुई जना पक्राउ परेका छन्। सिराहा गोलबजार नगरपालिका–६ का ३३ वर्षीय धर्मेन्द्र सिंह र सिराहा मिर्चैया नगरपालिका–५ का ३३ वर्षीय अनिल साहलाई निजहरुको डेराबाट लागुऔषधसहित पक्राउ गरिएको प्रहरीले जनाएको छ। - रासस

• RSS