२४ भदौ, सुर्खेत - सुर्खेतको वीरेन्द्रनगरमा लागुऔषध ब्राउन सुगरसहित दुई जना पक्राउ परेका छन्। पक्राउ पर्नेहरूमा वीरेन्द्रनगर नगरपालिका–३ का २६ वर्षीय भुवन भण्डारी र बराहाताल गाउँपालिका–९ का २८ वर्षीय चन्द्रबहादुर बुढाथोकी रहेका छन्।
जिल्ला प्रहरी कार्यालय सुर्खेतका प्रहरी नायव उपरीक्षक वीरेन्द्र वीर विश्वकर्माका अनुसार उनीहरूबाट १८ ग्राम ५४० मिलिग्राम ब्राउन सुगर र १० हजार नौ सय रुपैयाँ नगद बरामद भएको छ।
डीएसपी विश्वकर्माले दिएको जानकारी अनुसार, आइतबार बेलुका वीरेन्द्रनगर–८ क्याम्पस रोडमा लागुऔषध कारोबार भइरहेको गोप्य सूचनाका आधारमा प्रहरीले छापा मारेको थियो। जिल्ला प्रहरी कार्यालय र लागुऔषध नियन्त्रण शाखाको संयुक्त टोलीले उनीहरूलाई क्याम्पस रोडबाट नियन्त्रणमा लिएको हो।
हाल दुवै जनालाई जिल्ला प्रहरी कार्यालय सुर्खेतमा राखेर थप अनुसन्धान भइरहेको छ।
-
Jigyasanepal
