काठमाडौं, चैत १६ । देशका विभिन्न भू–भागमा मौसम बद्लिँदै गएको छ। जल तथा मौसम विज्ञान विभाग अन्तर्गतको मौसम पूर्वानुमान महाशाखाका अनुसार हाल नेपालमा पश्चिमी वायुका साथै स्थानीय वायुको प्रभाव कायम रहेकाले वर्षाको सम्भावना बढेको हो।

हाल देशका पहाडी तथा हिमाली क्षेत्रमा सामान्यदेखि घना बादल लागेको छ भने तराई क्षेत्रमा आंशिक बदली देखिएको छ। गण्डकी, कर्णाली र सुदूरपश्चिम प्रदेशका पहाडी तथा हिमाली भू–भागका केही स्थानमा मेघगर्जन र चट्याङसहित हल्का वर्षा भइरहेको महाशाखाले जनाएको छ।

आज दिउँसो विशेषगरी कोशी प्रदेश, बागमती प्रदेश र गण्डकी प्रदेश का पहाडी तथा हिमाली क्षेत्रमा मेघगर्जन र चट्याङसहित मध्यम वर्षाको सम्भावना रहेको छ। साथै मधेश प्रदेशका केही स्थान तथा लुम्बिनी, कर्णाली र सुदूरपश्चिमका पहाडी क्षेत्रमा समेत हल्कादेखि मध्यम वर्षा र हिमपात हुन सक्ने अनुमान गरिएको छ।

रातिको समयमा पनि मौसम पूर्ण रूपमा खुल्ने सम्भावना कम देखिएको छ। कोशी, गण्डकी, कर्णाली र सुदूरपश्चिमका पहाडी तथा हिमाली क्षेत्रमा एक–दुई स्थानमा मेघगर्जनसहित हल्का वर्षा र हिमपात हुन सक्ने महाशाखाले जनाएको छ।

मौसमविद्ले चट्याङ, वर्षा र हिमपातका कारण हुन सक्ने जोखिमप्रति सचेत रहन सर्वसाधारणलाई आग्रह गरेका छन्। विशेषगरी पहाडी तथा हिमाली क्षेत्रमा यात्रा गर्ने र कृषिमा संलग्न नागरिकलाई सतर्कता अपनाउन सुझाइएको छ।

• Jigyasanepal