बझाङ।
बझाङको सदरमुकाम चैनपुरमा एक व्यक्ति चितुवाको छालासहित पक्राउ परेका छन्। शुक्रबार साँझ थलारा गाउँपालिका-८ गन्डाउनीका खगेन्द्रराज जोशीलाई प्रहरीले चेकजाँचको क्रममा पक्राउ गरेको हो। जोशीले सिमेन्टको बोरामा लुकाएर चितुवाको छाला बोकेर हिँडिरहेको अवस्थामा पक्राउ गरिएको थियो।
प्रहरीका अनुसार छालाको लम्बाइ ८ फिट २ इन्च र चौडाइ ३ फिट २ इन्च रहेको छ, जसमा सेतो, कालो र खैरो बुट्टा रहेका छन्। छालामा दाँत र पञ्जा पनि फेला परेको प्रहरीले जनाएको छ। प्रहरी निरीक्षक किशोर जोशीको नेतृत्वमा रहेको टोलीले शंका लागेर गरेको चेकजाँचपछि यो अवैध सामान बरामद गरेको हो।
अहिले आरोपीलाई थप अनुसन्धानका लागि जिल्ला प्रहरी कार्यालयको हिरासतमा राखिएकोछ।
- Jigyasa media
