विराटनगर – मोरङको ग्रामथान गाउँपालिका–२ मा बुधबार दिउँसो बिजुलीको तार जोड्ने क्रममा करेन्ट लागेर एक व्यक्तिको ज्यान गएको छ। मृत्यु हुनेमा ५० वर्षीय जगदीश सरदार रहेको मोरङ प्रहरीका प्रवक्ता डीएसपी ज्ञानेन्द्रबहादुर बस्नेतले जानकारी दिएका छन्।
प्रहरीको प्रारम्भिक अनुसन्धान अनुसार, सरदारले आफ्नै घरमा बिजुलीको तार जडान गर्ने क्रममा दिउँसो १ बजेतिर करेन्ट लाग्दा घटनास्थलमै मृत्यु भएको हो।
घटनापछि इलाका प्रहरी कार्यालय बेलबारीबाट इन्स्पेक्टर कृष्णबहादुर खत्रीको टोलीले कानुनी प्रक्रिया पूरा गरी शवलाई पोस्टमार्टमका लागि विराटनगरको कोशी अस्पताल पठाएको छ। यस घटनाको थप अनुसन्धान भइरहेको प्रहरीले जनाएको छ।
सरदारको असामयिक मृत्युले गाउँमा शोकको छाया छाएको छ भने बिजुली जडानका क्रममा आवश्यक सुरक्षाका उपायहरू अपनाउन स्थानीयवासीलाई सचेत गराइएको छ।
- Jigyasa media
