काठमाडौं – पश्चिमी न्यूनचापीय प्रणालीको प्रभाव कमजोर हुँदै गएका संकेत देखिए पनि देशका केही भागमा वर्षा र हिमपातको सम्भावना कायमै रहेको मौसमविद्हरूले बताएका छन्।
जल तथा मौसम विज्ञान विभागका अनुसार आज बिहान देशका पहाडी भेगमा आंशिकदेखि सामान्य बदली देखिएको छ भने अन्य भागमा आंशिक बदली रहनुका साथै मौसम सफा देखिएको छ।
दिउँसोको समयमा पनि पहाडी क्षेत्रमा आंशिकदेखि सामान्य बदली रहने अनुमान गरिएको छ। सुदूरपश्चिम, कर्णाली, गण्डकी, बागमती, र कोशी प्रदेशका पहाडी क्षेत्रमा एक-दुई स्थानमा हल्का वर्षाको सम्भावना रहेको छ।
यस्तै, कोशी, बागमती, र गण्डकी प्रदेशका उच्च पहाडी तथा हिमाली भेगमा केही स्थानमा हल्का हिमपातको सम्भावना रहेको छ।
मौसमविद् सरोज पुडासैनीका अनुसार काठमाडौंमा पनि छिटपुट वर्षाको सम्भावना रहे पनि सम्भाव्यता निकै न्यून छ। "काठमाडौंमा वर्षा हुने सम्भावना केवल १० प्रतिशत मात्रै छ," पुडासैनी भन्छन्।
आज बिहान ५:४५ बजे काठमाडौंको न्यूनतम तापक्रम ८.२ डिग्री सेल्सियस मापन गरिएको छ। दिउँसो तापक्रम २२ देखि २४ डिग्री सेल्सियससम्म पुग्ने अनुमान गरिएको छ।
मौसमविद्हरूका अनुसार पश्चिमी न्यूनचापीय प्रणालीको प्रभाव क्रमशः कम हुँदै गइरहेको छ र आज रातिसम्म यसको सामान्यप्रभाव रहनेछ।
- Jigyasa media
