नवलपुर, चैत २६ — नवलपरासी (बर्दघाट–सुस्तापूर्व)को गैँडाकोट–१ मा मंगलबार साँझ नारायणी नदीमा डुबेर दुई बालबालिका बेपत्ता भएका छन्।
इलाका प्रहरी कार्यालय गैंडाकोटका अनुसार १३ वर्षीया दीक्षा सेर्पुञ्जा र उनका ९ वर्षीय भाइ स्वप्निल सेर्पुञ्जा नारायणी नदीमा डुबेर बेपत्ता भएका हुन्। उनीहरू आफ्नी हजुरआमा सुनमाया कुमालसँग नदी किनारमा गएका थिए।
हजुरआमाको चप्पल नदीमा बगिएपछि भाइ स्वप्निल त्यो लिन पानीतर्फ पुगेका थिए। उनी डुब्न थालेपछि दीक्षा उद्धार गर्न गएकी थिइन्। तर, दुवैजना नदीको तेज बहावमा परेर बेपत्ता भएका हुन्।
इलाका प्रहरी कार्यालयका निमित्त प्रमुख सानुकाजी विष्टका अनुसार घटनापछि खोजी कार्य प्रारम्भ गरिएको भए पनि प्रहरीसँग गोताखोरको अभावका कारण मंगलबारको खोजीकार्य रोकिएको छ।
‘बेपत्ता बालबालिकाको खोजी आज बिहानैदेखि गोताखोर टोलीसहित फेरि सुरु हुनेछ’, विष्टले जानकारी दिए।
- Jigyasa media
