कस्की ।
कास्कीको अन्नपूर्ण गाउँपालिका–११, पोडेमा आइतबार दिउँसो चट्याङ लागेर २ जनाको ज्यान गएको छ।
मृतकमा संखुवासभाको सिलीचोङ गाउँपालिका–२ का ४४ वर्षीय भरत कुविर राई र सोही ठाउँका १८ वर्षीय महेश राई रहेको कास्की प्रहरीले जनाएको छ।
आइतबार दिउँसो १ बजेको समयमा परेको चट्याङले करिब ३८ सय मिटरको उचाइमा रहेका उनीहरुको ज्यान लिएको हो। उनीहरु त्यहाँ मजदुरी गर्न पुगेका थिए।
उक्त स्थानमा पर्यटन बोर्ड र गाउँपालिकाको सहयोगमा हुँदै गरेको पदयात्रा मार्ग बिस्तारका लागि ९ जना मजदुर खटिएकोमा बाँकी ७ जना चाहिँ सुरक्षित रहेको प्रहरीको भनाइ छ।
काम आइतबारबाटै सुरु भएको हो। मृतकहरुको शव हिउँले पुरिएको अवस्थामा रहेकाले निकाल्नको लागि प्रहरी टोली परिचालित गरिएको पनि कास्की प्रहरीले जानकारी दिएको छ।
घटनास्थल कास्कीको प्रसिद्ध पर्यटकीय गाउँ घान्द्रुकबाट ४ घण्टा पैदयात्रा पछि पुगिन्छ।
-
Jigyasanepal
