साउन १९, काठमाडौं – नेपालको अधिकांश भूभागमा सक्रिय रहेको मनसुनका कारण आज सोमबार पनि देशभर व्यापक वर्षा हुने सम्भावना रहेको मौसम पूर्वानुमान महाशाखाले जनाएको छ।
महाशाखाले बिहान ६ बजे सार्वजनिक गरेको २४ घण्टे मौसम बुलेटिनअनुसार, आज दिनभर आकाश ढकमक्कै बदली रहनेछ भने अधिकांश स्थानमा मेघगर्जन र चट्याङसहित मध्यम वर्षा हुने सम्भावना छ।
🌩️ दिउँसो कस्तो हुन्छ मौसम ?
– कोसी, मधेस, बागमती, गण्डकी र लुम्बिनी प्रदेशका एक-दुई स्थानमा भारी वर्षा हुनसक्ने चेतावनी दिइएको छ।
– अन्य प्रदेशमा पनि विभिन्न स्थानमा वर्षा भइ नै रहनेछ।
🌧️ राति झनै सावधानी अपनाउनुपर्ने
– कोसी, मधेस, गण्डकी र लुम्बिनी प्रदेशका धेरै स्थानमा मध्यम वर्षाको सम्भावना।
– बागमती, गण्डकी र लुम्बिनीका थोरै स्थानमा भारीदेखि धेरै भारी वर्षाको चेतावनी जारी गरिएको छ।
🌬️ किन यति धेरै वर्षा?
विभागका अनुसार हाल मनसुनको न्यूनचापीय रेखा सरदरभन्दा उत्तरतर्फ सरेर नेपालको तराई नजिक सक्रिय भएकाले यस्तो अवस्था बनेको हो।
यसले देशभर नै मनसुन सक्रिय बनाउँदै मौसममा तीव्र उतारचढाव ल्याइरहेको छ।
📊 वर्षाको परिमाण यसरी छुट्याइन्छ
१० मिमि भन्दा कम = हल्का वर्षा
१०–५० मिमि = मध्यम वर्षा
५०–१०० मिमि = भारी वर्षा
१००–२०० मिमि = धेरै भारी वर्षा
२०० मिमि भन्दा माथि = अति भारी वर्षा
📌 वर्षा ‘कहाँ-कति’ भन्ने अनुमान यसरी हुन्छ
एक-दुई स्थान = १०% भन्दा कम क्षेत्र
थोरै स्थान = १०–३०%
केही स्थान = ३०–५०%
धेरै स्थान = ५०–८०%
अधिकांश स्थान = ८०% भन्दा बढी
⚠️ सावधानी अपनाऔं!
बाढी, पहिरो तथा सवारी अवरोधको जोखिम रहने सम्भावनालाई मध्यनजर गर्दै स्थानीय प्रशासन तथा बासिन्दालाई सतर्कता अपनाउन आग्रह गरिएको छ।
जल तथा सिँचाइ, विपद् व्यवस्थापन, यातायात र कृषिसम्बन्धी कार्यहरूमा योजना बनाउँदा मौसमको अपडेटमा ध्यान दिनु उपयुक्त हुनेछ।
-
Jigyasanepal
