अछाम, चैत २७ – बान्नीगढी जयगढ गाउँपालिका–३ स्थित जयगढ बजारमा मंगलबार साँझ भएको आगलागी अहिले बुधबार बिहान सम्म पनि अझै पूर्णरूपमा नियन्त्रणमा आउन सकेको छैन।

स्थानीय तारामान खड्काका अनुसार आगो निभाउने कार्यमा सबभन्दा ठूलो चुनौती पानीको अभाव बनेको छ। साँघुरा गल्लीहरू र दमकलमा प्रयाप्त पानी नहुनुले आगो नियन्त्रणमा कठिनाइ भएको बताइएको छ।

नेपाल प्रहरी, नेपाली सेना र स्थानीय बासिन्दाहरूको सहयोगमा आगो नियन्त्रणको प्रयास जारी छ। प्रारम्भिक जानकारीअनुसार एक सार्वजनिक सभाहलसहित, दुईवटा सुनचाँदी पसल, एक मोबाइल पसल, एक भाँडा पसल र चार किराना पसल पूर्ण रूपमा जलेर नष्ट भएका छन्।

जिल्ला प्रहरी कार्यालय अछामले दिएको विवरण अनुसार, आगलागीबाट कालु सुनार र किस्मत सुनाको सुनचाँदी पसल, रतन साउदको आवासीय घर, हिमाल साउदको मोबाइल पसल, रति साउदको भाँडा पसल, साथै रामबहादुर रावत, मञ्जु साउद र गोकुल साउदको किराना पसल पूर्णरूपमा क्षति पुगेको छ।

अहिलेसम्म मानवीय क्षतिको विवरण भने आएको छैन। आगलागीको कारण खुल्न बाँकी छ।

• Jigyasa media