काठमाडौँ, फागुन १६ — दक्षिण अमेरिकी राष्ट्र बोलिभियामा शनिबार बिहान भएको वायुसेनाको कार्गो विमान दुर्घटनामा कम्तीमा १५ जनाको मृत्यु भएको छ भने ३० भन्दा बढी व्यक्ति घाइते भएका छन्।

दुर्घटना राजधानी नजिकको एल अल्टो सहरमा भएको हो। बोलिभियाली वायुसेनाको हर्कुलस विमान देशको केन्द्रीय बैंकबाट नयाँ नोट बोकेर उडानमा रहेको बेला दुर्घटनाग्रस्त भएको अन्तर्राष्ट्रिय सञ्चारमाध्यमहरूले जनाएका छन्।

राष्ट्रिय अग्नि नियन्त्रक प्रमुख पावेल तोभरका अनुसार मृतकमध्ये चालक दलका सदस्यहरू र दुर्घटनास्थल आसपास रहेका सर्वसाधारण पनि रहेका छन्। दुर्घटनापछि घटनास्थलमा उद्धार तथा राहत कार्य तीव्र पारिएको छ। घाइतेहरूलाई स्थानीय अस्पतालहरूमा उपचारका लागि लगिएको छ, जहाँ केहीको अवस्था गम्भीर रहेको बताइएको छ।

विमान कसरी दुर्घटनामा पर्‍यो भन्ने विषयमा आधिकारिक विवरण सार्वजनिक भएको छैन। प्रारम्भिक अनुसन्धान सुरु गरिएको र प्राविधिक तथा सुरक्षा पक्षबारे छानबिन भइरहेको अधिकारीहरूले जनाएका छन्।

घटनाले एल अल्टो क्षेत्रका बासिन्दामा त्रास फैलाएको छ। सरकारी निकायले मृतकप्रति श्रद्धाञ्जली व्यक्त गर्दै पीडित परिवारलाई आवश्यक सहयोग उपलब्ध गराइने जनाएको छ।

• Jigyasanepal