भदौ १६, काठमाडौं ।
अफगानिस्तानमा गएको शक्तिशाली भूकम्पले विनाशकारी क्षति पुर्याएको छ । पूर्वी कुनर प्रान्त केन्द्रविन्दु भएको ६ म्याग्निच्युडको कम्पनले ८१२ जनाको ज्यान लिएको छ भने करिब २५ सय जना घाइते भएका छन् ।
गृह मन्त्रालयका अनुसार मृतकको संख्या अझै बढ्न सक्ने अनुमान छ, किनकि धेरै गाउँहरू पूर्ण रूपमा ध्वस्त भएका छन् ।
भूकम्प जमिनको सतहनजिकै गएकाले सामान्य परिमाण भए पनि ठूलो क्षति भएको विज्ञहरूले बताएका छन् । नानगरहार र कुनर प्रान्तमा मात्र सयौं घर भत्किएका छन्, सडक अवरुद्ध भएका छन् र उद्धार कार्यमा कठिनाइ भइरहेको छ।
स्वास्थ्य मन्त्रालयका प्रवक्ता सराफत जमानका अनुसार अस्पतालहरू घाइतेले भरिएका छन् । उनले भने, “अस्पतालमा अब बेड खाली छैन, घाइतेहरूको उपचार गर्न सक्ने क्षमताभन्दा धेरै बढी चाप परेको छ।”
यसैबीच, रक्षा मन्त्रालयले आपतकालीन राहतका लागि ३० जना चिकित्सक र ८०० किलो औषधि कुनर पठाएको जनाएको छ।
यो भूकम्प पछिल्लो दशकको सबैभन्दा ठूलो मानवीय संकटको रूपमा देखिएको अन्तर्राष्ट्रिय समाचार एजेन्सीहरूले जनाएका छन्।
-
Jigyasanepal
