पनौती, साउन ३ गते ।

पनौती नगरपालिका वडा नं. ५ को आयोजनामा तथा पनौती बाइक स्टेशनको प्राविधिक सहयोगमा सञ्चालित एकदिने साइकल मर्मत (साईकल रिपेयर) तालिम शनिवार सम्पन्न भएको छ।

कार्यक्रमको समापन समारोहमा सहभागीहरूलाई प्रमाणपत्र वितरण गरी सम्मान गरिएको थियो।

तालिममा स्थानिय युवाहरूको उल्लेखनीय उपस्थिति रहेको थियो। उनीहरूलाई साइकल मर्मतसम्बन्धी आधारभूत प्राविधिक ज्ञान, पाङ्ग्रा, ब्रेक, गेयर, चेन मर्मतदेखि नियमित सर्भिसिङसम्बन्धी सीप प्रदान गरिएको थियो।

वडा अध्यक्ष विनोद खत्रीको भनाइमा “आजको युवापुस्ता सिर्फ अध्ययनमै सीमित हुनुहुँदैन, सीप सिकेर आत्मनिर्भर बन्न सक्नुपर्छ। सीपमूलक तालिमहरू अब विकल्प होइन, अनिवार्य जस्तै भएका छन्। हामी वडाबाट अझ धेरै यस्ता कार्यक्रमहरू अगाडि ल्याउँदैछौं जसले हाम्रो युवा पुस्तालाई रोजगारी र आत्मबल दिन्छ।” वडास्तरीय कार्यालयले सीपमूलक तालिममार्फत युवालाई रोजगारमुखी बनाउने दीर्घकालीन लक्ष्य राखेको छ।

पनौती बाइक स्टेशनका प्राविधिक प्रशिक्षकहरूको सहकार्यमा संचालन गरिएको यस तालिमलाई सहभागीहरूले अत्यन्त उपयोगी र व्यवहारिक भएको प्रतिक्रिया दिएका छन्।

कार्यक्रम अन्त्यमा प्रमाणपत्र वितरण गर्दै सहभागीहरूलाई तालिममा सिकेको सीपलाई व्यवहारमा उतार्न आग्रह गरिएको थियो।

• Jigyasanepal