गाजा, २० कात्तिक – इजरायली हवाई आक्रमणबाट गाजाको उत्तरी बेत लाहिया सहरमा कम्तीमा ३५ प्यालेस्टिनीको ज्यान गएको छ। बमबारीले ध्वस्त भएको घरको भग्नावशेषमुनि अझै कैयौं मानिस फसेको प्यालेस्टिनी समाचार संस्था वाफाले जनाएको छ।
हालसम्म इजरायली सेनाले यस घटनाबारे कुनै औपचारिक प्रतिक्रिया दिएको छैन।
सन् २०२३ अक्टोबर ७ मा हमासले दक्षिणी इजरायली सिमानामा हमला गरेपछि इजरायलले गाजा क्षेत्रमा हमासविरुद्ध व्यापक आक्रमण सुरु गरेको थियो। यस आक्रमणमा इजरायली नागरिक र सुरक्षाकर्मी गरी झण्डै १,२०० जनाको मृत्यु भएको थियो भने करिब २५० जनालाई हमासले बन्धक बनाएको थियो।
गाजा पट्टीमा जारी आक्रमणका कारण हालसम्म ४३,३९१ प्यालेस्टिनीको ज्यान गएको गाजास्थित स्वास्थ्य अधिकारीहरूले मङ्गलबार जारी गरेको विज्ञप्तिमा उल्लेख गरेका छन्।
- Jigyasa media
