काठमाडौं । रौतहटमा हत्या गरी सुटकेसमा फालिएकी रुबीकुमारी साह सुडीको हत्या अनुसन्धानमा प्रहरीले महत्त्वपूर्ण 'क्लू' फेला पारेको छ । घटनामा संलग्न रहेको आरोपमा एक युवक पक्राउ परेपछि प्रहरीले अनुसन्धानमा महत्त्वपूर्ण उपलब्धि हासिल गरेको हो ।
मधेस प्रदेश प्रहरी प्रमुख डीआईजी उमाप्रसाद चतुर्वेदीले आफूहरू हत्याराको नजिक पुगेको दाबी गरे । “हामी हत्याराको नजिक छौँ । केही महत्त्वपूर्ण क्लू फेला पारेका छौँ । शव व्यवस्थापन गर्न सहयोग पुर्याउने युवालाई पक्राउ पनि गरेका छौँ । मुख्य हत्याराको खोजी भइरहेको छ,” डीआईजी चतुर्वेदीले भने ।
आइतबार बिहान गौर नगरपालिका–२ मा बस्दै आएकी करिब २६ वर्षीय रुबी मृत अवस्थामा भेटिएकी थिइन् । उनको शवलाई प्रहरीले गौर नागरपालिका–९ स्थित सिरसिया सडकखण्डमा सुटकेसभित्र प्याक गरेर राखेको अवस्थामा फेला पारेको थियो ।
रौतहटकै माधवनारायण नगरपालिका–६ माइती भएकी रुबीले भारतमा विवाह गरेकी थिइन् । तर, केही समयदेखि उनी रौतहटमै बस्दै आएकी थिइन् । चार वर्षीय छोरा पढाउन गौर नगरपालिका–२ महादेवपट्टीमा डेरा लिएर बस्दै आएकी रुबी शनिबार बजार निस्किएकी थिइन् ।
प्रहरीका अनुसार प्रहरीको प्रारम्भिक अनुसन्धानका क्रममा घटनास्थल शव भेटिएको ठाउँभन्दा टाढा भएको देखिएको छ । शवको शरीरमा चोटपटक पनि छैन । तर, नाकबाट रगत बगेको पाइएको छ ।
अनुसन्धानमा संलग्न प्रहरी अधिकारीका अनुसार, रुबीको हत्यामा संलग्न युवा केही समयअघि मात्रै वैदेशिक रोजगारीबाट नेपाल फर्किएको आशंका गरिएको छ । “हत्यामा संलग्न युवा केही समय अघि मात्रै नेपाल फर्किएकोजस्तो देखिन्छ । उनको सामाजिक सञ्जालमा राखिएको सुटकेस र रुबीको शव राखेर फ्याँकिएको सुटकेस मिल्दोजुल्दो देखिन्छ,” अनुसन्धानमा संलग्न ती अधिकारीले भने ।
प्रहरीका अनुसार, ती युवा रुबीसँग विवाह हुनुभन्दा पहिलेदेखि नै सम्पर्कमा रहेको खुलेको छ । विवाहपछि पनि उनीहरूबीच कुराकानी हुने गरेको देखिएको छ ।
आमासँग साढे ६ बजे अन्तिम फोन
करिब १३ वर्षअघि नै भारतको मुजफ्फरपुरका शिवसागरसित विवाह गरेकी रुबी गएको जेठदेखि मात्रै रौतहटको महादेवपट्टीमा कोठा भाडामा लिएर बस्दै आएकी थिइन् । रुबीसँगै उनकी आमा पनि कोठामा बस्दै आएकी थिइन् ।
शनिबार साँझ रुबी कोठाभन्दा करिब दुई किलोमिटर टाढा गौर हिँडिन् । ब्युटी पार्लर जाने भनेर उनी घरबाट निस्किएकी थिइन् । रुबीका आफन्त मुना पटेलका अनुसार, गौरमै रहेको काजल ब्युटी पार्लरबाट उनी साढे ६ बजे निस्किएको खुलेको छ ।
पटेलले भने, “काजल ब्युटी पार्लरबाट साढे ६ बजे निस्किएर घर फर्किंदा आमा र छोरासित फोनमा कुरा भएको थियो । आमालाई घरमा के ल्याउन भनेर समेत सोधेकी थिइन् । छोराका लागि जुस ल्याइदिने बताएकी थिइन् । त्यसपछि भने उनी सम्पर्कमा आइनन् ।”
साढे ६ बजे नै घर फर्किने भनेर फोन गरेकी आमालाई ढिलोसम्म पनि घर नफर्किएपछि उनले रुबीलाई फोन गरिन । तर, रुबीको फोन उठेन । करिब ९ बजेतिर पनि उनको फोन अफ भयो ।
शनिबार रातभर रुबीकी आमा छोरीको प्रतीक्षामै बसिन् । तर, आइतबार बिहान उनी सुटकेसमा भेटिएको शवको सनाखत गर्न जानुपर्यो ।
प्रहरीका अनुसार, शव भेटिएको स्थानभन्दा भारतीय सीमा बोर्डर करिब दुई किलोमिटर टाढा छ । तर, भारतीय सीमा बोर्डर बैरगनियामा पछिल्लो समय सुरक्षा जाँचमा कडाइ गरिएको छ ।
मृतक रुबीका आफन्तले घटना गौर क्षेत्रमै घटेको आशंका गरेका छन् । भारतको मुजफ्फरपुरबाट रुबीका श्रीमान् शिव सागर घटनापछि रौतहट पुगेका छन् । होटल व्यवसाय गर्दै आएका शिव सागरले छोराको पढाइका लागि श्रीमतीलाई रौतहट राखेका थिए । मुजफ्फरपुरको घरबाट स्कुल टाढा भएका कारण श्रीमती र छोरालाई रौतहट राखेको खुलेको छ ।
-
Jigyasanepal
