काठमाडौं – गोकर्णेश्वरमा एक महिलाको हत्या प्रकरणमा संलग्न रहेको आरोपमा प्रहरीले पाँच जनालाई नियन्त्रणमा लिएको छ। पक्राउ पर्नेहरूमा चार युवा तथा एक नाबालक रहेको प्रहरीले जनाएको छ।

पक्राउ पर्नेहरूमा सर्लाहीका २५ वर्षीय कैलाश खड्का, मकवानपुरका २० वर्षीय सुरेश तामाङ, नुवाकोटका २४ वर्षीय रोशन तामाङ, सिन्धुपाल्चोककी २० वर्षीया पूजा परियार तथा एक नाबालक रहेका छन्।

फागुन २४ गते गोकर्णेश्वर नगरपालिका–७ स्थित नामी कलेज नजिकैको बाग्मती खोलाको बीच भागमा, बोराभित्र डुबाइएका अवस्थामा अन्दाजी ३०–३५ वर्ष उमेरकी एक महिलाको शव फेला परेको थियो। घटनाबारे जानकारी पाएपछि प्रहरीले अनुसन्धान अघि बढाएको थियो।

शव परीक्षणका लागि त्रिवि शिक्षण अस्पताल, महाराजगन्जमा पठाइएको छ। प्रारम्भिक अनुसन्धानपछि प्रहरीले हत्यामा संलग्न रहेको आशंकामा पाँच जनालाई उपत्यकाका विभिन्न स्थानबाट पक्राउ गरेको हो।

हाल जिल्ला प्रहरी परिसर काठमाडौंको टोलीले पक्राउ परेका व्यक्तिहरूमाथि विस्तृत अनुसन्धान गरिरहेको छ। अदालतबाट ६ दिनको म्याद थप गरेर घटनाको थप अनुसन्धान अघि बढाइएको प्रहरी वृत्त बौद्धले जानकारीदिएको छ।

• Jigyasa media