काठमाडौं | नेपाली पत्रकारिता आन्दोलनका एक जीवित दस्तावेज, वरिष्ठ पत्रकार भैरव रिसाल अब हामीबीच रहेनन्। ९७ वर्षको उमेरमा, आइतबार साँझ फ्रन्टलाइन अस्पताल, पुरानो बानेश्वरमा उनले जीवनको अन्तिम श्वास लिए।

उनी केवल पत्रकार मात्र होइन, नैतिक मूल्य र सचेतना पत्रकारिताका आधारस्तम्भ थिए। उनले १९८५ सालमा जन्मिएर झण्डै सात दशकसम्म कलमको ताकतबाट समाजलाई दिशा दिँदै आएका थिए।

भैरव रिसालले मृत्युपछि पनि समाजसेवाको बाटो चुने। उनले आफ्नो पार्थिव शरीर ललितपुरस्थित पाटन अस्पताललाई शिक्षार्थ दान गर्ने निर्णय पहिल्यै गरेका थिए। भाइ पुरु रिसालका अनुसार, सोही अनुसार अस्पताललाई शव हस्तान्तरण गरिएको हो।

"दाजुले सदैव ज्ञानको उज्यालो बाँड्न चाहनुभयो। उहाँको शरीर पनि अन्ततः चिकित्साशास्त्रमा उपयोग हुने बन्यो," – भाइ पुरु रिसालले भने।

रिसालको अन्त्येष्टि हुनेछैन। कुनै धार्मिक विधिविधान वा कर्मकाण्ड नगरिने निर्णय गरिएको छ — जुन उनका जीवनदर्शन अनुरूप नै छ।

नेपालको पत्रकारिता इतिहासमा भैरव रिसालको योगदान केवल लेखनमा मात्र सीमित थिएन, उनले पत्रकारितालाई समाज परिवर्तनको औजार बनाउँदै आएका थिए। उनी सजग पत्रकार, नीतिगत विश्लेषक र सत्य खोजीका सिपाही थिए।

• Jigyasa media