साउन ३०, २०८२, शुक्रबार — काठमाडौं/कुवेत

कुवेतमा मेथानोल मिश्रित विषाक्त मदिरा सेवनका कारण भएको त्रासदीमा अहिलेसम्म १६ नेपाली आप्रवासी श्रमिकले ज्यान गुमाएका छन्। यससँगै कुवेतस्थित नेपाली राजदूतावासले स्वास्थ्यका लागि घातक र जोखिमपूर्ण खाद्य तथा पेय पदार्थ सेवन नगर्न विशेष आग्रह गरेको छ।

राजदूतावासले शुक्रबार साँझ विज्ञप्ति जारी गर्दै घटनाप्रति गहिरो दुःख व्यक्त गरेको छ र विषाक्त मदिराबाट टाढा रहन चेतावनी दिएको हो। राजदूत र दूतावासका कर्मचारीहरू नेपाली बिरामीहरूको उपचार भइरहेको अस्पताल पुगेर अवस्थाबारे प्रत्यक्ष जानकारी लिएको दूतावासले जनाएको छ।

नेपाल पत्रकार महासंघ वैदेशिक शाखा कुवेतका अनुसार गत सातादेखि हालसम्म कुवेतका विभिन्न स्थानमा अति प्रज्ज्वलनशील र घातक पदार्थ मेथानोल मिसाइएको मदिरा सेवनपछि २३ आप्रवासी श्रमिकको मृत्यु भएको छ, जसमा १६ जना नेपाली र बाँकी भारतीय रहेका छन्।

महासंघका अध्यक्ष एकराज मल्ल र सचिव आङकाजी शेर्पाद्वारा जारी विज्ञप्तिमा हालसम्म १६० भन्दा बढी आप्रवासी श्रमिक अस्पतालको सघन उपचारकक्षमा रहेको उल्लेख छ। मृतकहरूको नाम र ठेगाना भने अझै सार्वजनिक गरिएको छैन।

कुवेत सरकारले घटनाबारे अनुसन्धान भइरहेको जनाएको छ। यो घटनाले विदेशमा कार्यरत नेपाली आप्रवासी श्रमिकहरूबीच स्वास्थ्य सुरक्षा र सचेतनाको गहिरो आवश्यकता पुनः उजागर गरेको छ।

• Jigyasanepal