अर्जुन अधिकारी काभ्रे ।, असार ३१ । सशस्त्र प्रहरी बलको नम्बर १५ गण, काभ्रेका प्रमुख एसपी प्रेम प्रसाईँमाथि विभागीय कारबाही गरिएको छ। नेतृत्व कमजोरी, जनशक्ति व्यवस्थापनमा लापरवाही र मातहतप्रति दुर्व्यवहारको आरोप लागेपछि उनलाई झापाको पाथीभरा जवान तालिम शिक्षालयमा सरुवा गरिएको हो।

स्रोतका अनुसार, प्रसाईँमाथि आपतकालीन अवस्था (विपद्) मा पनि बढी संख्यामा जनशक्ति बिदामा पठाएको, बाँकी जनशक्तिलाई सुसंगठित रूपमा परिचालन नगरेको, र कर्मचारीहरूसँग दुव्र्यवहार गरेको गम्भीर आरोप लागेको छ।

✦ कारबाही चार दिनअघि नै सुरू, बाहिनीबाट तानिए

सरुवा भएर केही दिनमै गणबाट बिदाइ हुने तयारीमा रहेका प्रसाईँलाई चितवनस्थित गढीमाई बाहिनीले चार दिनअघि नै तानेको हो। सशस्त्र प्रहरीको स्पष्ट निर्देशन विपरीत उनले कार्यशैली प्रदर्शन गरेको भन्दै बाहिनीले कारबाहीको सिफारिस गरेको थियो।

✦ सहप्रवक्ताको पुष्टि

सशस्त्र प्रहरी बलका सहप्रवक्ता शैलेन्द्र थापाले प्रसाईँमाथि विभागीय कारबाही गरिएको पुष्टि गर्दै सो निर्णय संगठनको आन्तरिक मूल्यांकनपछि गरिएको जानकारी दिए। "उहाँलाई झापास्थित पाथीभरा तालिम शिक्षालयमा सरुवा गरिएको छ," थापाले बताए। सो शिक्षालयको नेतृत्व एसएसपी तहको अधिकृतले गर्ने गर्छन्।

✦ काभ्रेको नयाँ गणपति माधव रेग्मी

प्रसाईँको स्थानमा सशस्त्र प्रहरी बलले एसपी माधव रेग्मीलाई काभ्रे गणको प्रमुख (गणपति) को रूपमा सरुवा गरेको छ। रेग्मी अब काभ्रेमा सशस्त्र प्रहरीको नेतृत्व सम्हाल्नेछन्।

 यो घटनाले सशस्त्र प्रहरी संगठनभित्र पनि नेतृत्व र अनुशासनको मापदण्ड प्रति गम्भीरता राखिएको संकेत गर्दछ। विपद् व्यवस्थापनजस्तो संवेदनशील क्षेत्रमा लापरवाही सह्य नहुने सन्देश उच्चपदस्थ अधिकारीलाई समेत सशस्त अनुशासन लागू गरिँदै छ भन्ने सन्देश दिएको कतिपयले बताएका छन् । 

• Jigyasanepal